Европ тив даяар олон долоо хоногийн турш үргэлжилсэн ган гачгийн улмаас гол мөрөн, далай тэнгисийн ус татарч, түүхэн доод түвшиндээ хүрчээ. Харин гангийн улмаас татарсан тэнгис дотроос түүхэн ховор олдвор болон хэний ч төсөөлөөгүй “аюул” ил болсныг судалгааны багийн эрдэмтэд онцолж байна.

-ДАЛАЙН УС БҮРХСЭН ЭРТНИЙ ЧУЛУУН ГВАДАЛПЕРАЛЫН ДОЛМЕН ТОЙРОГ-

Испанийн Хант Улсад сүүлийн хэдэн арван жилд тохиогоогүй ган болжээ. Гангийн улмаас татарсан далайн усан дотроос “Испанийн Стоунхенж” гэж болохуйц далайн ус бүрхсэн эртний чулуун тойрог ил болсон байна.

                   Одоогийн байдлаар чулуун тойргийг Гвадалпералын Долмен гэж нэрлээд байгаа бөгөөд эрх баригчдын мэдээлснээр чулуун тойрог олдсон Вальдеканасын усан сангийн ус 28 хувь хүртлээ буурсан гэнэ.

-ГЕРМАНЫ РЕЙН ГОЛООС ОЛДСОН “ӨЛСГӨЛӨН”-ГИЙН ЧУЛУУ-

Европт даяар нүүрлэсэн ган гачгийн улмаас Германд нэгэн түүхэн дурсгал ил болсон байна. Германд орших Рейн голын ус хэдэн метрээр татарч, буурахад голын эрэг дагуу хүний нэр, огноо сийлсэн зууван хэлбэртэй чулуунууд ил гарч иржээ. Чулуун дээр сийлсэн огноо, нэрийг зарим судлаач урьд өмнө нь болж байсан ган гачиг, зовлонг сануулдаг гэж үздэг гэнэ. Тухайлбал, Франкфуртээс олдсон үүнтэй адил чулуун дээр 1947, 1959, 2003, 2018 оныг сийлсэн байсан нь тухайн нутагт тохиосон ган гачиг ихтэй жил байсан. Тиймээс Германы Рейн голын эрэг дагуу тодорсон чулуунуудыг “Өлсгөлөнгийн чулуу” гэж нэрлээд байгаа гэнэ.

-СЕРБИЙН ГОЛООС ОЛДСОН ДЭЛХИЙН ДАЙНЫ ҮЕИЙН НАЦИСТ ГЕРМАНЫ БАЙЛДААНЫ ХӨЛӨГ ОНГОЦУУД-

Европын ганд хамгийн их хэмжээгээр усны түвшин нь буурсан газруудын нэг нь Дунай мөрөн болжээ. Тэгвэл Дунай мөрнөөс эх авдаг Сербийн Прахово голын ус татрахад дэлхийн II дайны үед хамаарах нацист Германы 20 гаруй байлдааны хөлөг онгоц ил гарсан аж. Судалгааны багийн тайланд Прахово голоос олдсон байлдааны хөлөг онгоцуудыг 1944 онд Хар тэнгист таарсан Зөвлөлтийн цэргээс ухарч байхдаа Дунай мөрөнд давлагаанд цохиулж, сүйрсэн нацист Германы хөлөг гэж урьдчилсан байдлаар дүгнээд байгаа юм.

-ПО ГОЛЫН ЭРГЭЭС ДЭЛХИЙН ДАЙНЫ ҮЕИЙН БӨМБӨГ ОЛДОВ-

Италийн Борго Виржилио тосгонд орших По голын ус татрахад дэлхийн II дайны үед хамаарах бөмбөг олджээ. Тус бөмбөгийн хайгуулын багийнхан өнгөрсөн сарын сүүлээр По голоос олж, илрүүлсэн бөгөөд урсац багатай усанд живсэн, ойролцоогоор 450 кг жинтэй байсан аж. Харин цэргийн мэргэжилтнүүдийн зүгээс шалгалт хийхэд По голоос олдсон бөмбөг АНУ-ынх бөгөөд одоог хүртэл идэвхтэй байжээ. Эх сурвалжуудын мэдээлснээр бөмбөгийн ойрын хэдэн өдрийн дотор салгах бөгөөд уг ажиллагаатай холбогдуулан Борго Виржилио тосгоны ойролцоо амьдардаг 3000 орчим хүнийг нүүлгэн шилжүүлээд байгаа гэнэ.