Биеийн үнэр нь ижил төстэй хүмүүс хоорондоо найзалж, нөхөрлөх магадлал өндөр байдаг талаар Израилийн судлаачид туршилтаар батлан харуулжээ. Ижил үнэртэй хүмүүс нэгэнтэйгээ нөхөрлөдөг талаарх судалгаа өчигдөр “Science Advances” сэтгүүл нийтлэгдсэн байна.

                         Израилийн Вэйцманы Шинжлэх ухааны хүрээлэнгийн судалгааны багийн ахлагч Инбал Равреби “Хүнээс бусад хуурай газрын бүх хөхтөн амьтад бие биеэ үнэрлэх замаар найз нөхөр эсвэл дайсан бололцохоо шийддэг” гэж онцлон бичжээ. Үүнийг батлахын тулд тэд анхны харцаар найзлах хүсэл төрснөө хэлсэн хүмүүсийг судалгаандаа ашиглажээ. Улмаар судалгаанд оролцсон хүмүүсийн тал нь эрэгтэй, тал нь эмэгтэй, 22-39 насны 20 хосыг элдэв үнэрийн эх үүсвэрээс тусгаарласан орчинд хэсэг хугацаанд байлгаж, тэдгээрт тусгайлан өмсүүлсэн цамцанд шингэсэн биеийн үнэрийг нь “цахим хамар” гэх төхөөрөмжөөр хэмжсэн байна.

Эцэст нь найзуудын үнэр хоорондоо төстэй байсан бол найз биш хүмүүсийнх өөр өөр байсныг энэ туршилт баталжээ. Төхөөрөмжийн найдвартай байдлыг шалгахын тулд өөр хүмүүсээр туршилтад оролцогчдын цамцыг үнэрлүүлэн давхар шалгасан байна. Ингэхэд үр дүн нь мөн ижил гарчээ.

                         Бас хоорондоо удаан найзалсан хүмүүсийн амьдралын хэв маяг, хоол хүнс төстэй байдгаас үнэр нь ижил болсон байж болзошгүй гэж үзээд бас дахин нэг нэмэлт судалгаа явуулсан аж.