Д.Трамп эмнэлгээс гарчээ 
“Ковид-19”-ийн халдвар авч дөрөв хоногийн өмнө эмнэлэгт хэвтсэн АНУ-ын Ерөнхийлөгч Дональд Трамп Цагаан ордонд эмчилгээгээ үргэлжлүүлэхээр болж, эмнэлгээс гарчээ. Эмчлэгч эмч нар нь мэдэгдэл хийхээс ч өмнө Трамп бие нь сайн байгаа тухай твиттер хуудсандаа бичсэн юм. Сүүлийн 72 цагийн турш Д.Трамп халуураагүй, тиймээс гэртээ эмчлүүлж болно гэж эмч нар нь мэдэгдсэн билэ. 

Бишкекийн жагсагчид Төрийн ордон руу дайрав 

Кыргызстан Улсын парламентын сонгуулийн дүнг эсэргүүцсэн иргэд Төрийн ордон, Аюулгүй байдлын хорооны байр руу дайрсан тухай BBC  мэдээлжээ. Тус улсын Сонгуулийн төв хорооны мэдэгдэж буйгаар, санал хураалтын дүнгээр парламентад дөрвөн намын төлөөлөл багтсан бөгөөд сөрөг хүчний намуудаас долоон хувийн босгыг давсан нам байхгүй гэнэ. Харин сөрөг хүчнийхэн сонгуулийн дүнг будлиантуулсан, парламентад суудал авсан намууд эрх баригчидтай нягт уялдаатай ажилладаг гэж мэдэгдэж буй. Сонгуульд оролцсон 16 намын 12 нь санал хураалтын дүнг эсэргүүцэн жагсаж буй юм.

Ссонгуулийн санал хураалтын дүнг иргэд эсэргүүцэн гудамжинд гарч, цагдаа нар жагсагчдыг тараахын тулд хүч хэрэглэсэн бөгөөд жагсагчид Үндэсний аюулгүй байдлын хорооны байр руу дайрч, хоригдож байгаа Ерөнхийлөгч асан Алмазбек Атамбаев, Ерөнхий сайд асан Сапар Исаков нарыг суллажээ. 

ХБНГУ: Дүрвэгсдийн тоо буурч байна

ХБНГУ-ын эрх баригчдын мэдээлснээр сүүлийн 10 жилийн хугацаанд анх удаа дүрвэгсэд, цагаачдын тоо буурч байгаа гэнэ. Одоогоор тус улсад оршин суух зөвшөөрөлтэй цагаач, дүрвэгчийн тоо 1.31 сая байна. Энэ нь өнгөрсөн жил хагасын өмнөх үзүүлэлтээс 50 мянгаар цөөн гэсэн үг. Цар тахлын үед Герман улс гаднын иргэдийг хилээр нэвтрүүлэхийг хязгаарлах шийдвэр гаргасан ч дүрвэгч, цагаачдыг хүлээн авсаар байсан юм.