Коронавирусийн халдвар туссанаа мэдэгдэж, Уолтер Ридийн эмнэлэгт эмчлүүлж буй АНУ-ын Ерөнхийлөгч Дональд Трамп  өнгөрсөн ням гарагт эмнэлгээс түр гарч, өөрийг нь дэмжихээр ирсэн хүмүүст талархал илэрхийлэн, мэндчилсэн байна. Үүнийхээ өмнөхөн тэрбээр “Гадаа цугласан эх орончдод гэнэтийн бэлэг барих талаар бодож байна” гэж твиттер хуудсандаа бичсэн юм. Цагаан ордноос мэдэгдэж буйгаар Ерөнхийлөгч эмч нараас зөвшөөрөл авч, өөрийн болон өрөөлийн аюулгүй байдлыг хангах арга хэмжээ авсны дүнд ийнхүү түр гарсан гэнэ. Гэсэн ч Д.Трампын энэхүү үйлдлийг буруушаах хүн цөөнгүй байна. “200 гаруй мянган америк иргэн нас барсан. Бидэнд манлайлал хэрэгтэй болохоос зургаа татуулах ажиллагаа хэрэггүй” гэж Конгресс дэх Ардчилсан намын төлөөлөгч Хаким Жеффрис мэдэгдлээ. Д.Трамп коронавирусийн халдвар туссан, эмчлүүлж буй тухай, мөн айсуй Ерөнхийлөгчийн сонгуулийн кампанит ажлын талаар олон асуулт, таамаг гарсаар байгааг тоймлон хариулж байна. 
 

Сонгууль хойшлох уу 

Ирэх арваннэгдүгээр сарын 3-нд буюу товлосон хугацаандаа Ерөнхийлөгчийн сонгууль болно гэж ажиглагчид үзэж байна. Америкийн “Politico” сэтгүүлд онцолж буйгаар Төрийн тэргүүний сонгуулийг хойшлуулж байсан удаагүй. Зөвхөн 1841 онд Ерөнхийлөгч Уильям Гаррисон албан ажлаа хүлээн авснаас сарын дараа нас барахад ээлжит сонгууль зохион байгуулах уу гэдэг маргаан гарч байсан аж. Нэр дэвшигчдээс хэн нэгэн нь нас барах зэрэг ноцтой зүйл тохиолдохгүй  л  бол сонгууль хойшлохгүй, сонгуулийн кампанит ажил ч  өрнөдгөөрөө өрнөнө гэж улс төр судлаачид үзэж буй. 

Д.Трампын биеийн байдал хэрхэж байна вэ

Одоогоор Ерөнхийлөгч Дональд Трамп болон Тэргүүн хатагтай нарын биеийн байдал сайн байгаа бөгөөд эмчилгээ хэвийн үргэлжилж буйг эмч Шон Конли мэдэгдсэн. Нөгөө талаас Стэнфордын их сургуулийн анагаах ухааны сургуулийн халдварт өвчний тасгийн эрхлэгч Упиндер Сингх  коронавирусийн халдвар авсан тохиолдлуудаас харахад өвчтөнд эхний 7-10 хоногт ноцтой хүндрэл ажиглагдахгүй ч 10-14 дэх хоногтоо бие нь огцом муудаж байгааг сануулжээ. Түүнчлэн Дональд Трамп өдгөө 74 настай, илүүдэл жинтэй зэрэг нөхцөл байдлыг харгалзан үзвэл өвчин хүндрэх эрсдэл өндөр гэж Бостоны Брихэмийн эмнэлгийн яаралтай тусламжийн эмч Жереми Фауст мэдэгдсэн. 

Д.Трампт ямар эмчилгээ хийж байна вэ 

Д.Трампын эмчийн мэдэгдэж буйгаар, Ерөнхийлөгчид хүчилтөрөгчийн нэмэлт эмчилгээ, аппарат залгах төдийлэн шаардлагагүй,  ремдесивир эмээр эмчилж байгаа гэнэ. Анх Эболагийн вирус дэгдэх үед гарган авч, одоо ч коронавирусийн эмчилгээнд ашиглаж буй уг бэлдмэл вирусийн үржлийг сааруулж, өвчний шинж тэмдгийг бууруулах үйлчилгээтэй. Д.Трампыг эмнэлэгт хэвтэхийн өмнө буюу өнгөрсөн баасан гарагт эмч Шон Конли мөн “Regeneron” компанийн гарган авсан эсрэг биетийн коктейлийг найман граммын тунгаар Ерөнхийлөгчид хийсэн гэж мэдэгдсэн юм. Үүний зэрэгцээ Ерөнхийлөгч цайр, Д аминдэм, фамотидин, мелатонин,  аспирин зэргийг нэмэлтээр ууж байгаа гэж эмч  онцолжээ.
 

Жо Байден  халдвар авсан уу 

Ерөнхийлөгчийн сонгуулийн анхны мэтгэлцээнд Дональд Трамптай нэг дор байсан Ардчилсан намаас нэр дэвшигч Жо Байден коронавирусийн халдвар авсан байх магадлалтай юу гэсэн асуулт гарч ирж буй. Хэдийгээр тэд нэг газар байсан ч бие биенээсээ хоёр метрийн зайтай зогсож, гар бариагүй тул Жо Байден халдвар авсан байх магадлал бага гэж эмч нар үзэж буй. Жо Байден болон Ерөнхийлөгчтэй ойр, нэг дор байсан арван хүнд коронавирусийн сорил хийсэн ч тэдний хариу нь сөрөг гарчээ. 
 

Д.Трампын нэр хүнд өсөх үү 

Сонгуулийн кампанит ажил эхэлсэн, санал хураалт болоход нэг сар хүрэхгүй хугацаа үлдсэн энэ үед Д.Трамп коронавирусийн халдвар туссан нь түүний рейтингт тодорхой хэмжээгээр нөлөөлж таарна. Умард Америк дахь ВВС-гийн сурвалжлагч Энтони Зуркерын мэдээлснээс үзвэл Д.Трампыг хурдан эдгэрэхийг ерөөсөн, түүнийг дэмжсэн хүмүүсийн тоо нэмэгдсээр буй аж. Томоохон хотуудад Д.Трампыг дэмжсэн лоозон, бичиг өргөсөн хүмүүст гудамжинд гарч, дэмжлэгээ илэрхийлж байна. 
Үүний зэрэгцээ Вашингтоны улс төр судлаач Эрик Хэмм “Ерөнхийлөгч өөрийн хэнэггүй зангаасаа болж коронавирус туссан гэж шүүмжлэх хүн ч цөөнгүй” гэж онцлов. Америкт цар тахал эхэлсний дараа Цагаан ордон ч, Төрийн тэргүүн Д.Трамп ч аюул, эрсдлийг үл тоож, амны хаалт зүүгээгүй, тусгаарлалтын дэглэм сахиагүй гэж  Эрик Хэмм мөн үзэж буй. “Financial Times”-аас хамгийн сүүлд танилцуулсан судалгаанаас харвал Ардчилсан намаас нэр дэвшигч Жо Байдены нэр хүнд Д.Трампынхаас 10 хувиар илүү байжээ. Өөрөөр хэлбэл, сонгогчдын 43 хувь нь Бүгд найрамдах намаас нэр дэвшигчийн төлөө, 51 хувь нь Ардчилсан намын нэр дэвшигчийн төлөө саналаа өгөх магадлалтай байв. Гэвч одоо үүсээд буй нөхцөл байдал айсуй сонгуульд хэрхэн нөлөөлөхийг таамаглахад бэрх байна. Сонгуулийн кампанит ажил, иргэдтэй хийх уулзалт, мэтгэлцээний хуваарьт тодорхой өөрчлөлт орж, энэ нь санал хураалтын дүнд нөлөөлж болзошгүй юм. 

“Хурдан эдгээрэй”

АНУ-ын Ерөнхийлөгч Дональд Трамп болон Тэргүүн хатагтай Меланиа Трампт хурдан эдгэрэхийг хүссэн мэдэгдлүүд дэлхийн улс орнуудын удирдагчдаас ирсээр байна. Тухайлбал, БНХАУ-ын удирдагч  Ким Жон Ун Трампын гэр бүлд хурдан эдгэрэхийг ерөөж, захидал илгээжээ. Мөн ОХУ-ын Ерөнхийлөгч Владимир Путин, ХБНГУ-ын Канцлер Ангела Меркель, Их Британийн Ерөнхий сайд Борис Жонсон, Туркийн Ерөнхийлөгч Режеп Тайип Эрдоган, Италийн Ерөнхий сайд Жузеппе Конте тэргүүтэй улс орны удирдагч нар Д.Трампын гэр бүлд эрүүл энхийг хүссэн юм. 

Эх сурвалж: BBC, Forbes