ОНЦЛОХ ҮЙЛ ЯВДАЛ

1920 он

1920 оны есдүгээр сарын 16-ны энэ өдөр АНУ-ын Нью-Йорк хотын хөрөнгийн биржийн төвийн урд Уолл гудамжинд морин тэрэгт хийсэн тэсрэх бөмбөг дэлбэрч, 38 хүн амиа алдсан хэрэг гарчээ. Бөмбөг дэлбэрсэн хэргийн мөрдөн байцаагчид эхэндээ осол байсан байж магад хэмээн мэдээлж байсан юм. АНУ-ын Холбооны мөрдөх товчооноос өнөөг хүртэл бөмбөг дэлбэлсэн хэргийн үнэнийг олж, илрүүлж чадаагүй бөгөөд 1919 онд Америк даяар цуврал аллага үйлдэж байсан анархистуудын хийсэн алан хядах ажиллагаа гэж үздэг байна.

1974 он

1974 оны есдүгээр сарын 16-ны энэ өдөр АНУ-ын Ерөнхийлөгч Жеральд Форд Вьетнамын дайнаас зугтсан хүмүүст өршөөл үзүүлжээ. Тухайн үед Вьетнам-Америкийн дайнд оролцох цэрэг татлагаас америк залуус зугтаж, эх орноосоо дүрвэж байсан юм. АНУ-ын Ерөнхийлөгч Жеральд Форд хоёр жил болон түүнээс дээш хугацаагаар ажилласан хүмүүст өршөөл үзүүлсэн байна. Харин өршөөлөөс өмнө эх орноосоо дүрвэсэн хүмүүсийг дахин АНУ-д нэвтрэх эрхийг нь хязгаарласан байдаг.

ОНЦЛОХ ХҮН

Арнольд Шварценеггер

1983 оны есдүгээр сарын 16-ны энэ өдөр нэрт жүжигчин Арнольд Нварценеггер АНУ-ын иргэншилтэй болжээ. Австри-Америк гаралтай нэрт жүжигчин 15 настайгаасаа хүчний бэлтгэл хийж, 22 настайдаа Дэлхийн мистер цолтой болж, Мистер олимпод тэргүүлсэн юм. Удалгүй бодибилдингийн спортоосоо зодог тайлж, Холливудын жүжигчин болов. Арнольд Шварценеггер “Конан-Варвар”, “Терминатор” зэрэг кинонд дүр бүтээснээрээ Холливудад алдаршжээ. Дэлхийн мистер, Холливудын од Арнольд Шварценеггер АНУ-ын иргэншилтэй болсноос гадна Калифорни муж улсын амбан захирагчийн сонгогдон ажиллаж байсан юм.

Ци Байши

1957 оны есдүгээр сарын 16-ны энэ өдөр Хятадын алдарт зураач, каллирафийн мастер Ци Байши таалал төгсжээ. Харсан бүхнээ зурдаг байсан нь түүний уран зургийн нэгэн өвөрмөц хэлбэр гэгддэг. Уран зураг, каллиграфиас гадна шүлэг, яруу найрагч, утга зохиолд дурлаж явсан нь “Хэн Шан уулын 12 байгалийн зураг” хэмээх алдарт бүтээл болсон аж. 93 насласан Ци Байшигийн хойч үедээ үлдээсэн уран зургууд дахь чөлөөт композиц нь өнөөг хүртэл шинэлэг байдаг.

Б.Б.Кинг

1925 оны есдүгээр сарын 16-ны энэ өдөр АНУ-ын нэрт дуу зохиогч блюз дуучин Райли Б. Кинг мэндэлжээ. Райли Кинг бага насаа АНУ-ын Миссисипи мужийн Ита Бена хотын хөвөн тариаланд өнгөрүүлж, түүний дараа Индиана хотын хөвөн цэвэрлэх үйлдвэрт ажиллаж байсан юм. Хөвөнгийн үйлдвэрээс “төрсөн” Райли Кинг блюз хөгжмөөрөө Америк даяар түгэж, түүний гитарын нарийн дууг сонсох гэж дэлхийн өнцөг булан бүрээс хүмүүс зорьж ирэх болж гэнэ. Нэрт дуучин Б.Б.Кинг 2015 оны тавдугаар сарын 14-нд 89 насандаа таалах төгсөх хүртлээ дэлхийн тойрон аялан тоглолт хийж байсан нь өдгөө түүнийг “Блюзийн хаан” хэмээн сонсогчид дурсахад хүргэсэн биз ээ.