Амаржаад удаагүй эмэгтэйг коронавирусийн халдвартай хэмээн хүүхдийнх нь хамт ХӨСҮТ рүү зөөвөрлөхдөө идэр есийн хүйтэнд халаад, тавчик, нимгэн өлгийтэй нь хүйтэн машинд суулгасан явдал олон нийтийн бухимдлыг төрүүлсэн. Улмаар Шадар сайд, УОК-ын дарга Я.Содбаатар, Эрүүл мэндийн сайд Т.Мөнхсайхан нарыг огцруулахыг шаардсан жагсаал өчигдөр төв талбайд болсон. Уг жагсаалын үр дүнд таван албан тушаалтныг суудлаас нь буулгаж, хүний эрхийн төлөө тэмцэж чаддаг ард түмэн гэдгээ харуулав. Үүгээр ч дуусахгүй Ерөнхий сайд У.Хүрэлсүх танхимаараа огцорно гэдгээ мэдэгдсэн бөгөөд үүнийг МАН Удирдах зөвлөлөөрөө дэмжээд байгаа юм.

Ганц хүний эхлүүлсэн сайн дурын тус жагсаал төрд эргэлт хийх гол хүч болсон гэхэд хилсдэхгүй. Эсэргүүцэлд оролцсон иргэдийн 70-80 хувь нь залуучууд байсан нь “Хувьсгал хийхийн дохио” гэдгийг жагсаалд оролцогчид хэлж байлаа. Түүнчлэн жирэмсэн эмэгтэй, залуу үеийн төлөөлөл болох 20 гаруй насны эрэгтэй 20 хэмийн хүйтэнд хувцсаа тайлан нүцгэлж эсэргүүцлээ илэрхийлсэн. Хүйтнийг үл ажран жагсах иргэдэд халуун цай, кофе өгч яваа залуус, хоёроос гурван халуун савтай цай хажуудаа тавин “Миний хүү даарч байгаа байх. Халуун цай уу” хэмээн суух буурай хүртэл байсан нь монголчууд нэгдэж чаддаг гэдгээ харуулсан, сэргэлт хийж чадсан жагсаал болсон юм.