Сүүлийн үед морь сонирхдог болон түүнийг өөрийн хоббигоо болгосон цөөнгүй хүн адуу үржүүлэг хийх болсны нэг нь Гансүхийн Хадбаатар юм. Түүний жүчээгээр зочлохоор Төв аймгийн Алтанбулаг сумыг зорилооо. Тэрээр долоон жилийн өмнө үржүүлэг хийх болсон бөгөөд дэлхийд хурдаараа нэгдүгээрт үнэлэгддэг Англи, Араб болон шинэ цагийн азаргануудаар адуу үржүүлэг хийдэг байна. Цэвэр цусны хоёр, шинэ цагийн Монгол азарга хоёр, мөн долоо орчим монгол азаргаар үржүүлэг хийдэг бөгөөд жилд 60 орчим гүү хээлтүүлдэг байна.

Цэвэр цусны болон шинэ цагийн адуу монгол адууг бодвол хурдаараа илүү гэдгээрээ дэлхийд батлагдсан. Харин зөн совин, тэсвэр хатуужил, хүч чадлаараа монгол адууг гүйцэхгүй билээ. Тэгвэл Англи, Араб зэрэг адууг монгол адуутай нийлүүлэг хийхэд ойр болон холын зайн уралдаанд чансаагаараа тэргүүлэх хэмжээний хурд сайн, чадвартай төл гардаг. Иймд хурдны чиглэлээр үржүүлэг хийн, адуун сүргийн үүлдэр угсааг сайжруулж, том цолонд хүрэх гэхээсээ илүү хурд хүчээрээ дэлхийд дуурсагдах монгол адууны удамшлыг хадгалах нь адуу үржүүлэгч хүн бүрийн хүсэл гэхэд гажуудахгүй болов уу. Тэр ч утгаараа “Хүнд муу адуу зарж болохгүй” гэх зарчмыг баримталдаг Хадбаатарын хувьд хурд хүч сайтай цэвэр цусны “Сагур” дуудлагатай зээрд халзан азаргаа 10 гаруй азарганаас нэг нэгээр нь алхуулж үзэж байгаад сонгон авчээ. Түүний найм орчим төл нь улс, бүсийн уралдаан болон 1000 долларын уралдаан зэрэг бүхий л томоохон уралдаанд түрүүлж, айрагдсан гэдгийг хурдан морь сонирхогчид мэдэх биз ээ.