Цагаан, хар өнгийн товчлуур буюу клавикуудын хоршил нэгдсэнээр сонсголонг бүтээнэ.  Гагцхүү энэ нэгдэл дээр ямар ч төрлийн ая оруулж тоглож болно. Энэ бол төгс төгөлдрийн бэлгэдэл төгөлдөр хуур. Тэр бол хөгжмийн хаан.  Бид “Монголын гэрэлт ирээдүй” булангийнхаа энэ удаагийн дугаарт DGL хөгжмийн академийн төгөлдөр хуурын ангийн бяцхан хөгжимчдийг онцолж, сурвалжиллаа.

   DGL хөгжмийн академи нь төгөлдөр хуураас гадна морин хуур, гитар, хийл хөгжмийн сургалт явуулдаг аж. Сургалтын төвийн үүдээр ормогц үүдний сандал дээр хоёр хөвгүүн гитар хөгжим дээр "Gangbay" хамтлагийн “Ганган цагаан” дууны аяыг тоглож сууна. Анги бүрээс төрөл бүрийн хөгжим эгшиглэнэ. Сургалтын төвийн анги болгонд өөр, өөр хөгжмийн хичээл ордгийг тохижолтоос нь харж болохуйц.

Биднийг очиход төгөлдөр хуурын ангид зургаан сурагч тус бүрнээ чихэвч зүүж, өөр өөрсдийн хичээлээ давтаж байв. Тэд дор бүрнээ өөр ая сурч байгаа нь энэ. Төгөлдөр хуурын товчлуур дээр тэдний бяцхан гар хүрмэгц жижигхэн алх тусгай механик үйлдлээр чавxдасыг цохиж, үүсэх доргилтоор дуу гардаг юм байна. Тэд эхлээд нот, дараагаар нь хэмжээ буюу хэмнэлийн хичээл үздэг. Ингэснээр хэмжээндээ тохируулан ая тоглож сурдаг байна.

       Төгөлдөр хуурыг хөгжмийн хаан гэж сонсоод, хичээллэж эхлэхээр шийдсэн гэж ярих дуу цөөтэй даруухан охиныг Г.Мишээл гэдэг. Г.Мишээл охин есөн настай.  “Би том болоод алдартай хөгжимчин болно.  Хамгийн анх “twinkle, twinkle” гэдэг аяыг хоёр хоногийн дотор тоглож сураад өөрийгөө хөгжимчин болж чадах юм байна гэж бодсон. Нотыг хөгжим дээр амилуулж эхлэхэд би өөртөө итгэлтэй болдог. Одоо бол төгөлдөр хуураа хэзээ ч орхихгүй. Төгөлдөр хуур тоглоод эхлэхээр эргэн тойрноосоо тасраад, алдартай хөгжимчин болчихсон юм шиг санагддаг” гэв. Тэр төгөлдөр хуур хөгжмөөр хичээллээд удаагүй.  Гэсэн хэдий ч ирээдүйгээ хэдийн төгөлдөр хууртай холбожээ. Бүр дэлхийд  алдартай төгөлдөр хуурчаар өөрийгөө төсөөлдөг гэнэ.

DGL хөгжмийн академийн хөгжмийн хичээл 60 минут үргэлжилдэг. Эхний хичээл 10:00 цагт эхэлдэг бол сүүлчийн хичээл 20:00 цагт дуусдаг. Хүүхдүүд өглөө хичээлд явахаасаа өмнө болон хичээлээ тараад сургалт руугаа яарсаар ирдэг байна.

Мозартын аянуудыг сонсож эхлээд сонгодог урлагт эргэлт буцалтгүй дурласан охиныг Т.Ариунзаяа гэдэг. Тэр төгөлдөр хуур хөгжмийг эрхэмсэг бөгөөд элит хөгжим гэж тодорхойлсон юм. Бид 15 настай Т.Ариунзаяа “хөгжимчин”-тэй цөөн хором ярилцлаа.   

-Яагаад төгөлдөр хуур хөгжмөөр хичээллэх болсон бэ?

-Би сонгодог урлагт их дуртай. Мозартын аянуудыг түлхүү сонсдог. Төгөлдөр хуур өөрөө эрхэмсэг, элит төрлийн хөгжим юм шиг санагдсан. Тиймээс би тоглож сурахаар шийдсэн.

-Төгөлдөр хуур хөгжмөөр хичээллээд хэр удаж байна вэ?

-Бага ангид байхдаа төгөлдөр хуурын сургалтад явж байгаад больсон. DGL хөгжмийн академийн төгөлдөр хуурын ангид ороод гурван сар болж байна.

-Мэргэжлээ сонгож амжсан уу, ирээдүйд ямар мэргэжилтэй хүн болох вэ?

-Би эмч болно гэж боддог. Мэдээж төгөлдөр хуураа орхихгүй. Хоббигоо илүү хөгжүүлээд, суралцаад явна. Өөрийн гэсэн хоббитой байвал гоё шүү дээ.

-Чамд даган дуурайдаг, хүндэлж явдаг төгөлдөр хуурч  бий юу?

-Daarya буюу Анударь төгөлдөр хуурчийг хөгжимчнийх нь хувьд хүндэлдэг. Түүний төгөлдөр хуур тоглож байгаа арга барил нь надад илүү таалагддаг.

- Төгөлдөр хуурын сургалтад сууснаар чамд ямар өөрчлөлтүүд гарсан бэ?

-Урьд өмнөхөөсөө илүү сонсгол маань нээгдэж хөгжмөө мэдэрч байгаа. Мөн илүү хүлээцтэй, өөртөө итгэлтэй болсон. Хамгийн гол нь өөрийнхөө дуртай зүйлийг бага багаар таньж мэдэж байгаа нь надад илүү сонирхолтой байна.

-Гэр бүлийнхэн чинь чамайг хэр дэмждэг вэ?

-Удаан хугацаанд бэлтгэл хийгээд дараагаар нь гэр бүлийнхэндээ тоглож өгөх хамгийн гоё нь. Манай гэрийнхэн намайг маш сайн дэмждэг. "Бэлтгэлээ сайн хийгээрэй" гээд төгөлдөр хуур хүртэл авч өгсөн.

   Дугуйлангийн сурагчдыг төгөлдөр хуур хөгжимд татагдах үндсийг нь тавьж, илүү удаан нөхөрлөхөд нь чиглүүлж өгдөг хүн бол Д.Мөнхзаяа багш. Тэр СУИС-ийг төгөлдөр хуурч мэргэжлээр төгссөн. Өөрийн сурсан багахан мэдлэгээ хүүхдүүдэд хуваалцаж, сонгодог урлагийн талаар ойлголт түгээхийг илүүд үздэг хэмээсэн.  Тэрбээр "Төгөлдөр хуур хөгжмийг сурсны дараагаар бусад хөгжмийг тоглоход дөхөм байдаг. Утсан хөгжмүүдийг бодвол төгөлдөр хуур хөгжмийг сурахад илүү хялбар. Тиймээс бага насны хүүхдүүд эхлээд төгөлдөр хуур хөгжмөөр хичээллэх нь тохиромжтой. Төгөлдөр хуур хөгжмөөр хичээллэснээр хүүхдүүд гоо зүйн мэдрэмжээс гадна сууж сурах, тэвчээртэй болох олон давуу талтай.

"Манайд урлагийн хүн байхгүй. Манай хүүхэд чадах болов уу" гэж эцэг эхчүүд санаа зовдог. Миний хувьд хөдөлмөр 99 хувь, авьяас нэг хувь гэдэгтэй бүрэн санал нийлдэг. Тухайн хүүхэд сонсголтой, авьяастай эсэх нь чухал биш. Өөрөө сонирхолтой, хичээж чадвал хөгжим сурахад асуудал байхгүй” гэв.

Өдөр бүр нот амилуулж, түүндээ урамшин урагшилсаар яваа бяцхан хөгжимчдийн мөрөөдөл алсад бий. Тэд сонгодог хөгжмөөр дамжуулан өөрийгөө таньж мэдэх их хүсэлд хөтлөгдөж энд ирсэн. Цаашид ч мэдрэмжээ хөгжүүлсээр, "урласаар" байх нь лавтай.