“ПакЖонгХы кап” олон улсын таеквондогийн тэмцээнээс алтан медаль хүртсэн М.Өсөхбаярыг энэ удаагийн "Түүчээ” буландаа урьж, ярилцлаа.

-Сайн байна уу. Юун түрүүнд манай уншигчдад өөрийгөө танилцуулаач?

-Сайн байна уу, намайг Мөнхсоёл овогтой Өсөхбаяр гэдэг. ХААИС-ийн гуравдугаар курсийн оюутан, таеквондогоор хичээллээд 13 жил болж байна.

-БНСУ-д зохион байгуулагдсан олон улсын тэмцээнээс алтан медаль хүртсэнд баяр хүргэе. Тэмцээний талаар сэтгэгдлээ хуваалцаач?

-“ПакЖонгХы кап” олон улсын таеквондогийн тэмцээн долдугаар 19-22-ны хооронд зохион байгуулагдаж дууссан. Би энэхүү тэмцээнээс тулааны төрөл (athletic) -д оролцож, -54 кг-д алтан медаль хүртсэн. Мөн энэ тэмцээнд нийт 6000 гаруй тамирчин оролцсон бөгөөд 17 дэвжээн дээр зэрэг өрсөлдсөн. Тэмцээн нийт дөрөв хоног үргэлжилсэн. Миний хувьд дараагийн тэмцээндээ бэлтгээд БНСУ-ын байрлаж байна. Эх орныхоо нэрийг олон улсын дэвжээнд гаргаж буйдаа баяртай байна.

-Энэ спортоор яагаад хичээллэх болов, юу нь  таны сонирхлыг татсан юм бэ?

-Таеквондогийн спортоор 2011 оноос хойш хичээллэж байна. Анх дүү маань “Энэ подвальд таеквондогийн дугуйлан байдаг, найз минь явдаг” гэж байсан. Тэгээд цонхоор нь цагаан өмсгөл өмссөн тамирчдыг хараад сонирхож, хичээллэж эхэлсэн дээ.

-Таны хамгийн хүчтэй өрсөлдөгч хэн бэ. Тамирчид өрсөлдөгчөөсөө олон зүйл сурдаг шүү дээ?

-Клубийнхаа найзтайгаа алтан медалийн төлөө өрсөлдөх үе л хамгийн дурсамжтай, сургамжтай санагддаг. Ер нь тэднээсээ л их юм сурдаг даа.

-Таеквондогийн спортоор хичээллэж эхлээд хамгийн анх оролцсон тэмцээнийхээ талаар ярихгүй юу. Тухайн үед ямар мэдрэмж төрсөн бэ?

-2011 онд  “Хөтөл cup” тэмцээнд оролцоод, анхны тэмцээнээсээ мөнгөн медаль авч байсан. Анхны гэдэг утгаараа их сандарч, айж байсан санагддаг. Яг юу болоод байгааг анзаарах сөхөөгүй явсаар нэг мэдэхэд медалийн тавцанд зогсож байсан. Тамирчин хүн бүрд шантрах хүнд үе тохиодог байх. Бэлтгэлээ огт явмааргүй санагдаад, тэгээд бэлтгэлдээ явахгүй үедээ надаас муу байсан тамирчин медаль авч буйг харахаар шар хөдөлдөг.

-Таеквондогийн спорт амьдралд нь хэрхэн нөлөөлсөн бэ?

-Хүндлэлийн спорт болохоор хүнээс үг сонсож, биеэ дааж, бусдыг хүндэлж сурсан. Мөн маш том эерэг хүрээлэлтэй болсон доо.

-Тэмцээний талбар дээр гараад тулалдахад ямар мэдрэмж төрдөг вэ?

-Өмнө нь маш их сандардаг байсан. Одоо бол ганц дуртай, чаддаг юм болохоор шалгалт өгч байна  гэж бодож тулалддаг даа.

-Та таеквондог юу гэж тайлбарлах вэ. Таны хувьд юу вэ?

- Таеквондо бол хүндлэл, ур чадвар, тэвчээрийн спорт юм.

-Таны дараагийн зорилго төлөвлөгөө, оролцохыг хүсдэг тэмцээн юу вэ?

 -Олон улсын чанартай бүхий л тэмцээнд оролцохыг зорьж байгаа. Мөн ДАШТ-ээс медаль хүртэхийг мөрөөддөг дөө. Өмнө нь улсын аваргын таван алт, хоёр мөнгө, хоёр хүрэл, “Оюутны юнивэрсал” нэг мөнгө, Оюутны улсын аваргын алт, “Chuncheon Korea open” тэмцээний мөнгө, “Korea Park chung hee cup”-аас алтан медаль хүртэж байсан. Мөн өөр хэд хэдэн тэмцээнээс медаль хүртсэн. Энэ амжилтаа цаашдаа улам ахиулж, эх орныхоо нэрийг дуурсгасан тамирчин болох болно оо.

-Ярилцсанд баярлалаа. Дараагийн тэмцээнд нь амжилт хүсье.

 -Баярлалаа.