Монголын тэргүүлэх артистуудын нэгэн гол төлөөлөл, Make up артист А.Баярзаяаг урьж, ярилцлаа.

-Сайн байна уу. Мэргэжлийн артист болох гараагаа хэрхэн эхлүүлж байв?

       -Их сургуулиа төгсөхдөө хүүгээ төрүүлж байлаа. Гэртээ хүүгээ хараад сууж байх үедээ өөрийгөө хөгжүүлж, нүүр будаж сурмаар санагдсан. Хүүгээ унтуулчихаад, гэрийнхээ жижиг ширээн дээр юүтүбээс бичлэг үзэж, дуурайж буддаг байлаа. Нүүр будалт амархан юм шиг харагддаг хэрнээ хэцүү. “Ер нь больё, би хэрэггүй зүйлд цаг хугацаагаа зориулаад байгаа юм байна” гэж бодоод л унтана. Тэгээд маргааш нь сэрээд “Ахиад нэг оролдоод үзье” гээд л будаг, багсаа бариад суудаг байсан. 

       Эхний хоёр жил хүүхэд нялх байсан болохоор ойр тойрны хүмүүсээ л буддаг байлаа. Одоо өөрийнхөө студийг байгуулаад есөн жил болсон байна. Ингээд бодоход хүү минь өсөж, том болохын хэрээр миний ур чадвар хамт өсөж байна даа. Би нүүр будалтын сургууль төгсөөгүй. Өөрийнхөө уйгагүй хөдөлмөр, тууштай байдлынхаа хүчээр л өнөөдрийг хүрсэн. Хүн ер нь дуртай зүйлээ олоод, түүнийхээ төлөө тууштай зүтгэж чадвал амжилтад хүрдэг юм билээ.

-Нүүр будалтын хамгийн чухал зүйл, түгээмэл гаргадаг алдаа юу вэ?

        -Дийлэнх хүн үнэтэй бүтээгдэхүүн хэрэглэвэл л гоё харагдана гэж боддог. Миний хувьд энд тэндхийн гоо сайхны дэлгүүрээс хямд будаг авч л эхэлж байсан. Тэгээд бага багаар бүтээгдэхүүний чанараа дээшлүүлсээр одоо хамгийн чанартай зүйлсийг хэрэглэдэг. Мэдээж үнэтэй будаг тогтоц сайтай, гаралт тод, арьсанд хор нөлөө бага үзүүлдэг. Харин нүүр будалтын хамгийн том алдаа нь суурь кремээ арьсны өнгө болон онцлогт тохируулж чаддаггүйд байдаг. Буруу крем сонгосноор хэт будсан харагдах, өө сэв улам тодрох эрсдэлтэй. Тохирох кремээ олоод сайн уусгах, үүнийхээ дараа өөртөө тохирсон өнгөөр нүд, хөмсөг, уруулаа будах хэрэгтэй. Хамгийн чухал нь зөв өнгө, уусгалт гэдгийг мартаж болохгүй.

-Артист болохыг хүсэж байгаа хүмүүст зөвлөгөө өгөөч?

               -Миний сурч эхэлж байсан үеийг бодвол одоо олон сургалт, артистуудтай болсон. Сургалтад суувал цаг завыг тань илүү хэмнэнэ. Гэхдээ хамгийн чухал зүйл бол дахин дахин оролдох, тууштай байх юм шүү.

-Одоо А.Баярзаяа гэх  хувь хүний талаар ярилцах уу. Хүүхэд нас, гэр бүлийнхээ талаар яриа дэлгээч?

        -Би цэцэрлэгт явах дургүй хүүхэд байлаа. Тэгээд Хэрлэн голын хөвөөнд өвөө, эмээдээ эрхэлж өссөн дөө. Эмээгийнхээ өвөрт унтаж, өвөөтэйгөө морь унаж, хонь хариулдаг үе минь одоо бодоход үнэхээр нандин дурсамж байдаг. Арван жилийн сургуулиа Налайх дүүрэгт төгссөн. Айлын том охин, одоо нөхөр, хүү, охин гуравтайгаа амьдардаг.

-Их сургуулиа ямар мэргэжлээр төгссөн бэ?

              -Би Хүмүүнлэгийн ухааны сургуулийг сэтгүүлч мэргэжлээр төгссөн. Мэргэжлээрээ ажиллаж байгаагүй, гэхдээ боломж цаг хугацаа нь таарах юм бол ажиллана гэж боддог. Хүүхэд байхдаа нэвтрүүлэгч болж тоглодог, зохион бичих сонирхолтой байсан минь энэ мэргэжлийг сонгоход хөтөлсөн байх. Оюутан байхдаа олны өмнө гарч ярихаасаа илүү бичих дуртай, фэйсбүүк дээр богино бичвэр оруулдаг байсан. Одоо бичих минь эрс багасаж, илүүтэй ярьдаг болсон байна.

-Эргээд бичиж эхлэх, магадгүй зохиол бичих бодол бий юү?

               -Байгаа, хэрвээ би ном бичвэл өөрийгөө туулсан амьдралын тухай бичнэ гэж боддог. Мөн нүүр будалтын тухай ном бичих байх. Өөрийнхөө амьдралын түүхийг бичнэ гэхээр учиргүй амьдрал заана гэсэн үг биш. Зүгээр үр хойчдоо юу үзэж, туулсан, хэн байсан гэдгээ л бичиж үлдээхийг хүсэж байна. Би цахим сүлжээнд хэдий идэвхтэй, үргэлж л гоё сайхан талаа харуулдаг ч хүмүүсийн мэдэхгүй зүйл олон бий. Тиймдээ ч хүмүүс намайг нүүрээ гоё будаад, өөртөө анхаарч дасгал хөдөлгөөн хийгээд л ямар асуудалгүй, ачаалалгүй амьдардаг гэж хардаг байх. Гэвч энэ бүхний ард бас нэгэн өөр амьдрал өрнөж байдаг.

-Таны цахим хуудсыг харахад эрүүл амьдралын хэв маягийг эрхэмлэдэг нь харагддаг. Тэр талаар манай уншигчдад хуваалцаач?

          -Сүүлийн үед хүмүүс гаднах гоо сайхандаа хэт анхаарч, дотоод сэтгэлийн сайхан чанарт анхаарахаа больсон нь ажиглагдсан. Үргэлж нүүрээ гоё будаж, урт сормуус, хиймэл хумстай явах тийм чухал биш. Монголчуудад хүний дор орохгүй байх, хүнд царай алдсан, ядарсан харагдахгүй байх гэсэн зан байдаг. Миний хувьд дасгал хөдөлгөөн хийж, эрүүл хооллоод таван жил болж байна. Бусдад гоё сайхан биетэй харагдахын тулд л хурдан хугацаанд эрүүл бусаар битгий тураарай гэж хэлмээр санагддаг. Хамгийн чухал нь өөртөө сайхан, өөрийгөө эрүүл байлгахад анхаарч, хайрлах шүү дээ. Өөрийгөө хайрлаж чадсан хүн бусдыг, бусдын хөдөлмөрийг хайрлаж чаддаг гэдэгт итгэдэг.