Томуу, томуу төст өвчний дэгдэлтээс хамаарч нийслэлийн есөн дүүргийн 12 эрүүл мэндийн байгууллагад хүүхдийн тусламжийн орыг нэмэгдүүлж, нийт 1607 ор дэлгэхээр төлөвлөжээ.

   Өнөөдрийн байдлаар дээрх 12 эрүүл мэндийн байгууллагад хүүхдийн тусламжийн 772 ор дэлгэн ажиллаж байна. Томуугийн дэгдэлт нэмэгдсэн тохиолдолд орны тоог 115 хувиар нэмэгдүүлж, 1607 хүргэхээр төлөвлөсөн байна. Хотын дарга Б.Пүрэвдагва Баянгол дүүргийн Эрүүл мэндийн төвд ажиллаж, дүүргийн эмнэлгүүдийн өвөлжилтийн бэлтгэл, томуу, томуу төст өвчний дэгдэлтийн үеийн бэлэн байдал, дархлаажуулалт болон эмнэлгийн тусламж, үйлчилгээний нөхцөл байдалтай танилцжээ.

   Нийслэлийн Эрүүл мэндийн газрын дарга Н.Наранбаатарын мэдээлснээр Баянгол дүүрэгт томуу, томуу төст өвчнөөс урьдчилан сэргийлэх дархлаажуулалтын хамралт 54.2 хувьд хүрчээ. Тэрбээр томуугийн эсрэг дархлаажуулалтад хамрагдсанаар эмнэлэгт хандах өвчлөлийг 20 хувь, хэвтэн эмчлүүлэх тохиолдлыг 30 болон түүнээс дээш хувиар бууруулах боломжтой гэсэн судалгаа байдгийг онцолжээ.

   Мөн Баянгол дүүргийн Эрүүл мэндийн төвийн дарга Ц.Бямбасүрэн тус төвд тулгамдаж буй асуудлын талаар мэдээлэл өгсөн байна. Тус төвд энэ оны зургаадугаар сарын байдлаар хорт хавдрын 2672 тохиолдол хяналтад байгаа бөгөөд өмнөх онуудтай харьцуулахад дөрөв, тав дахин нэмэгдсэн байна. Мөн хөнгөвчлөх эмчилгээний 10 ор хүрэлцээгүй байгаа тул засвар, өргөтгөл хийж, орны тоог 25-д хүргэх шаардлагатайг мэдээлжээ.

   Түүнчлэн хөнгөвчлөх тасаг, мэс заслын өрөөний хүчин чадалтай уялдуулан хүчилтөрөгчийн үйлдвэр байгуулах, бөөрний архаг дутагдалтай 52 өвчтөнд үйлчлэх диализын тоног төхөөрөмжийг шинэчлэх шаардлагатай байгааг танилцуулсан байна. Тус төвд 2016 онд суурилуулсан дөрвөн диализын аппарат одоог хүртэл шинэчлэгдээгүй аж. Б.Пүрэвдагва эрчимт эмчилгээний тоног төхөөрөмж, хөнгөвчлөх тасгийн өргөтгөл болон эмнэлгийн дэргэд хүчилтөрөгчийн үйлдвэр байгуулах асуудлыг шуурхай шийдвэрлэхийг холбогдох албаныханд үүрэг болгожээ.

   Мөн диализын аппаратыг шинэчлэх боломжийг судлах, томуу, томуу төст өвчнөөс урьдчилан сэргийлэх дархлаажуулалтад иргэдийг идэвхтэй хамруулахыг уриалсан байна. Тэрбээр энэ өвөл эх, хүүхдийг эмнэлгийн коридорт эмчлүүлэхгүй байх нөхцөлийг бүрдүүлэхээр төрөлжсөн тусламж, үйлчилгээний зохион байгуулалтыг хийж байгааг онцолжээ. Мөн эмнэлгүүдийн зогсоолын эхний хоёр цагийг үнэ төлбөргүй болгосон ч үйлчлүүлээгүй иргэд автомашинаа байршуулснаас зогсоолын хүрэлцээ муу байгаа асуудлыг судлахыг үүрэг болгосон байна.