Люксембургийн Их Гүнт Улсын Засгийн газрын буцалтгүй тусламжаар Монгол Улсын эрүүл мэндийн салбарт хэрэгжүүлсэн төслүүдийн 25 жилийн ойн баярын хурал болжээ.

   Энэ үеэр Эрүүл мэндийн сайд Э.Батшугар Монгол, Люксембургийн эрүүл мэндийн салбарын 25 жилийн хамтын ажиллагааны үр дүн, цаашдын зорилтын талаар онцлон тэмдэглэжээ.

Хамтын ажиллагааны хүрээнд олон төсөл хэрэгжүүлжээ

   Өнгөрсөн 25 жилийн хугацаанд зүрх судас, эх, нярайн тусламж үйлчилгээний чанар, хүртээмжийг сайжруулах, орчин үеийн тоног төхөөрөмж, шинэ технологи нэвтрүүлэх, эмч, эмнэлгийн мэргэжилтнүүдийг чадавхжуулах чиглэлээр олон төсөл хэрэгжүүлсэн байна.

   Төслүүдийн үр дүнд 10 мянган хүн амд ногдох зүрх судасны шалтгаант нас баралт 24.4-өөс 16.7 болж буурчээ. Мөн зүрх судасны өвчнөөр оношлогдсон иргэдийн дундах нас баралт дөрөв дахин буурсан байна. Түүнчлэн хүүхдийн хэрэх өвчнөөс урьдчилан сэргийлэх, стрептококкийн халдварыг эрт илрүүлж, эмчлэх чиглэлээр 800 мянга гаруй хүүхдийг хамруулжээ.

Алсын зайн анагаах ухааныг нэвтрүүлсэн

   Монгол Улсад 2001 оноос алсын зайн анагаах ухааныг нэвтрүүлснээр орон нутгийн иргэд нарийн мэргэжлийн эмчээс зөвлөгөө авах боломж нэмэгдсэн байна. Үүний үр дүнд шаардлагагүй шилжүүлгийн хувь 80.3-аас 38.1 болж буурчээ. Мөн 21 аймаг, есөн дүүргийн эмнэлэгт нийт 8.7 сая гаруй еврогийн үнэ бүхий 60 гаруй төрлийн оношилгоо, эмчилгээний тоног төхөөрөмж нийлүүлж, эмнэлгийн мэргэжилтнүүдийг сурган бэлтгэсэн байна.

“Хамгийн үнэ цэнтэй нь мэдлэг, ур чадвар”

   Эрүүл мэндийн сайд Э.Батшугар энэ үеэр “Эдгээр тоо, тоног төхөөрөмжийн цаана хамгийн үнэ цэнтэй нэг зүйл бий. Тэр нь монголын эмч, эмнэлгийн мэргэжилтнүүдэд үлдсэн мэдлэг, ур чадвар юм” хэмээн онцолжээ.

   Тухайлбал, 2008 оноос хойш нээлттэй зүрхний мэс заслын тоо 13 дахин өссөн байна. Өнөөдөр Монголын эмч нар 15 төрлийн нээлттэй зүрхний мэс заслыг эх орондоо бие даан хийж, жилд дунджаар 500-550 орчим мэс засал хийж байгаа аж.

Зүрх судасны үндэсний төвийн төсөл хэрэгжинэ

   Монгол, Люксембургийн эрүүл мэндийн салбарын 25 жилийн хамтын ажиллагааны бодит үргэлжлэл болох Зүрх судасны үндэсний төвийн төслийг мөн онцолсон байна.

Тус төв байгуулагдсанаар зүрх судасны өвчнөөс урьдчилан сэргийлэх, оношилгоо, эмчилгээ, мэс засал, сэргээн засах тусламж үйлчилгээг сургалт, судалгаатай уялдуулан хөгжүүлэх боломж бүрдэхийг Эрүүл мэндийн сайд тэмдэглэв. Тэрбээр Монгол, Люксембургийн эрүүл мэндийн салбарын хамтын ажиллагаанд хувь нэмрээ оруулж ирсэн хоёр орны Засгийн газар, Люксембургийн хөгжлийн хамтын ажиллагааны байгууллага, түнш эмнэлгүүд, төслийн баг, эмч, эмнэлгийн мэргэжилтнүүдэд талархал илэрхийлсэн байна.

   Цаашид өнгөрсөн 25 жилийн итгэлцэл, хамтын ажиллагааны суурь дээр эрүүл мэндийн салбарын түншлэлийг улам бэхжүүлж, Монгол Улсын иргэдийн эрүүл мэндэд бодит үр өгөөжтэй төслүүдийг хэрэгжүүлэхээр зорьж байгаагаа илэрхийлжээ.