Эрүүл мэндийн тусламж, үйлчилгээний хүртээмж, чанарыг сайжруулах зорилгоор дүүргийн төсвийн хөрөнгөөр Сонгинохайрхан нэгдсэн эмнэлэгт ангиографийн аппарат суурилуулж, ашиглалтад оруулжээ.

   Германы Siemens Healthineers компанийн Artis Zee Biplane загварын тус аппарат нь судас дотуурх оношилгоо, эмчилгээ хийх зориулалттай орчин үеийн өндөр хүчин чадал бүхий тоног төхөөрөмж ажээ.

   Ингэснээр Сонгинохайрхан дүүргийн иргэд титэм судас болон цээж, хэвлийн хөндийн судасны эмгэгийн оношилгоо, эмчилгээ хийлгэхийн тулд улсын хоёр, гуравдугаар шатлалын эмнэлгийг зорих шаардлагагүй болж, дүүргийн эмнэлгээсээ тусламж, үйлчилгээг цаг алдалгүй авах боломж бүрдэж байгаа юм.

   Ангиографийн аппаратыг ашиглан:

• Титэм судасны нарийслыг баллоноор тэлэх;

• Судас дотуур стент тавих;

• Гар, хөлийн захын судасны бөглөрөл, нарийслыг эмчлэх;

• Тархины судасны эмгэгийн үед судас дотуурх эмчилгээ хийх;

• Хавдрын тэжээгч судсанд эмчилгээ хийх;

• Судасны зарим гаж хөгжил, аневризмыг судас дотуурх аргаар эмчлэх;

• Дүрсийн хяналттай биопси болон бусад ажилбар хийх боломжтой.

• 

   Шинэ тоног төхөөрөмжийг ашиглалтад оруулснаар судас дотуурх оношилгоо, эмчилгээний тусламж, үйлчилгээг дүүргийн түвшинд үзүүлэх боломж нэмэгдэж, иргэдэд үзүүлэх тусламж үйлчилгээний хүртээмжийг сайжруулахад чухал ач холбогдолтой болж байгаа аж.