Эрүүл мэндийн сайд Э.Батшугар Азийн хөгжлийн банкны Хүн ба нийгмийн хөгжил хариуцсан дэд дарга Аяако Инагаки тэргүүтэй төлөөлөгчдийг хүлээн авч уулзжээ.

   Уулзалтаар эрүүл мэндийн салбарт хэрэгжиж буй төсөл, хөтөлбөрүүдийн явц, шинээр хэрэгжүүлэх төслүүд болон цаашдын хамтын ажиллагааны талаар санал солилцсон байна. Азийн хөгжлийн банк нь Монгол Улсын эрүүл мэндийн салбарын шинэчлэл, хөгжлийг дэмжиж, 1991 оноос хойш техник, арга зүйн болон санхүүгийн дэмжлэг үзүүлж ирсэн. Өнгөрсөн хугацаанд тус салбарт нийт 84.9 сая ам.долларын таван зээлийн төсөл, 37 сая ам.долларын долоон буцалтгүй тусламж, 10.65 сая ам.долларын 15 техникийн туслалцааны төсөл хэрэгжүүлжээ.

   Мөн КОВИД-19 цар тахлын үед АХБ-наас 30 сая ам.долларын яаралтай тусламжийн зээл олгож, эмнэлгийн тоног төхөөрөмж, хамгаалах хэрэгсэл болон шаардлагатай эмнэлгийн хэрэгслээр хангахад дэмжлэг үзүүлсэн байна. Уулзалтын үеэр шинээр хэрэгжүүлэхээр төлөвлөж буй 225 сая ам.долларын санхүүжилттэй “Аймгийн эрүүл мэндийн тусламж, үйлчилгээний чанарыг сайжруулах” төслийн талаар хэлэлцжээ.

   Төслийн хүрээнд 21 аймгийн эрүүл мэндийн байгууллага болон хөдөө орон нутгийн нийт 25 эрүүл мэндийн байгууллагын барилга байгууламж, дэд бүтэц, орчин үеийн тоног төхөөрөмж, тусламж үйлчилгээний чадавхыг сайжруулах ажлуудыг хэрэгжүүлэхээр төлөвлөж байна. Түүнчлэн өвчний хяналт, сэргийлэлтийн чиглэлээр хэрэгжүүлэх ажлууд, цаашид Өвчний хяналт, сэргийлэлтийн төвийг хөгжүүлэхэд АХБ-тай хамтран ажиллах боломжийн талаар санал солилцов. АХБ-ны төлөөлөгчид энэ чиглэлээр дэмжлэг үзүүлж, хамтран ажиллах боломжтойгоо илэрхийлжээ.

   Эрүүл мэндийн сайд Э.Батшугар Монгол Улсын эрүүл мэндийн салбарын шинэчлэлийг эрчимжүүлэх, иргэдэд хүрэх тусламж, үйлчилгээний чанар, хүртээмжийг сайжруулахад АХБ-тай олон жилийн турш үргэлжилж ирсэн хамтын ажиллагааг цаашид улам өргөжүүлэхийн чухлыг онцолжээ.