Монгол Улсын иргэдийг Бүгд Найрамдах Солонгос Улсад хөдөлмөрийн гэрээгээр ажиллуулахтай холбоотой эрүүл мэндийн үзлэг, шинжилгээний үйл ажиллагаатай танилцахаар БНСУ-ын Хөдөлмөр эрхлэлтийн хөгжлийн сангийн дэргэдэх ЁЖҮ сургалтын төвийн удирдах албан тушаалтнууд ХӨСҮТ-д зочилжээ.

Монгол Улс, БНСУ-ын Засгийн газар хоорондын хөдөлмөр эрхлэлтийн хамтын ажиллагаа 2004 оноос эхлэн амжилттай хэрэгжиж байгаа аж.

Айлчлалын үеэр БНСУ-д хөдөлмөрийн гэрээгээр ажиллах иргэдэд эрүүл мэндийн үзлэг, шинжилгээ хийдэг байгууллагын үйл ажиллагаатай танилцаж, үзлэг, шинжилгээний зохион байгуулалт, байгууллагуудын үйл ажиллагааны уялдаа холбоо болон цаашид анхаарах асуудлын талаар санал солилцон, харилцан туршлага хуваалцжээ.

ЁЖҮ сургалтын төв нь БНСУ-д хөдөлмөрийн гэрээгээр ажиллахаар зорьж буй Монгол, Вьетнам, Тайланд, Лаос, Мьянмар, Тажикистан зэрэг 17 улсын иргэдийг хүлээн авч, эрүүл мэндийн үзлэгт хамруулан, гэрээ байгуулсан ажил олгогчдод хүлээлгэн өгөх үйл ажиллагааг зохион байгуулдаг байна.

Цаашид талууд эрүүл мэндийн үзлэг, шинжилгээний чиглэлээр харилцан туршлага солилцох, мэдээлэл болон үйл ажиллагааны уялдаа холбоог сайжруулах замаар хамтын ажиллагаагаа өргөжүүлэхээр санал нэгджээ.

Ингэснээр Монгол Улсын иргэдийн эрүүл мэнд, хөдөлмөрийн аюулгүй байдлыг хангах чиглэлээр хэрэгжүүлж буй ажлын үр нөлөөг нэмэгдүүлэхэд анхаарч ажиллахаар болжээ.