Хүүхдийн эрүүл мэндийн эрсдэлийг өвчин хүндэрсэн хойно нь эмчлэхээс илүүтэй эрт үед нь илрүүлж, шаардлагатай тусламж, үйлчилгээнд цаг алдалгүй холбох нь өвчлөлийн хүндрэлээс сэргийлэх чухал ач холбогдолтой.

   Энэ хүрээнд хүүхдийн нас, хөгжлийн онцлогт нийцсэн эрүүл мэндийн урьдчилан сэргийлэх, эрт илрүүлэх үзлэгийг цэцэрлэг, сургуульд суурилан нэгдсэн аргачлал, стандартын дагуу хэрэгжүүлэх бэлтгэл ажлыг хангаж байна.

   Монгол Улсын Засгийн газрын 2026 оны долдугаар сарын 8-ны өдрийн 301 дүгээр тогтоолын хэрэгжилтийг хангах хүрээнд “Хүүхдийн цэцэрлэг, ерөнхий боловсролын сургуульд суурилсан эрүүл мэндийн урьдчилан сэргийлэх, эрт илрүүлэх үзлэг”-ийн сургагч багш бэлтгэх сургалтыг наймдугаар сарын 24-27-ны өдрүүдэд Эх, хүүхдийн эрүүл мэндийн үндэсний төвд зохион байгуулж, амжилттай өндөрлүүлжээ.

   Дөрвөн өдрийн сургалтад 21 аймаг, нийслэлийн 9 дүүргийн хүүхдийн эмч нар хамрагдаж, хүүхдийн эрүүл мэндийн эрсдэлийг зөв үнэлэх, үзлэгийг нэгдсэн аргачлалаар зохион байгуулах, мэдээллийг стандартын дагуу бүртгэх, шаардлагатай тохиолдолд дараагийн шатлалын тусламж, үйлчилгээнд холбон ажиллах мэдлэг, ур чадвараа дээшлүүлсэн байна.

   Энэ удаагийн үзлэг нь хүүхдийн нас, хөгжлийн онцлогт нийцсэн иж бүрэн үнэлгээ хийхэд чиглэж байгаагаараа онцлог. Тухайлбал, 36 сартай, 6 настай буюу нэгдүгээр анги, 11 настай буюу тавдугаар анги, 15 настай буюу есдүгээр ангийн хүүхдийн өсөлт, хөгжил, харааны чадал, харааны эмгэг, зүрхний цахилгаан бичлэгт суурилсан үнэлгээ, нурууны муруйлт, хавтгай тавхай, хөгжлийн хоцрогдол, аутизмын хүрээний эмгэгийн эрсдэл болон өсвөр үеийнхний сэтгэцийн эрүүл мэндийн эрсдэлийг илрүүлэх үзлэг, тандалтыг стандарт аргачлалын дагуу хийх ур чадварыг эзэмшүүлжээ.

   Сургалтын үеэр онолын мэдлэгийг практик дадлагатай хослуулж, оролцогчид зүрхний цахилгаан бичлэг хийх, үзлэгийн мэдээллийг зөв бүртгэх, эрүүл мэндийн эрсдэлийг үнэлэх, эрт илрүүлгийн бүртгэлийн маягтыг зөв хөтлөх зэрэг ур чадвараа бататгасан байна. Мөн бодит тохиолдолд тулгуурлан эрсдэлийг тодорхойлох, цаашид авах арга хэмжээг шийдвэрлэх, үзлэгийн үр дүн болон илэрсэн эрсдэлийн талаар эцэг эх, асран хамгаалагчдад ойлгомжтой мэдээлэл, зөвлөгөө өгөх харилцааны ур чадварт суралцжээ.

  Сургалтын нэг онцлог нь оролцогчдыг зөвхөн үзлэг хийх аргачлалд сургаад зогсохгүй сургагч багшийн арга зүйгээр чадавхжуулсан явдал юм. Ингэснээр бэлтгэгдсэн сургагч багш нар цаашид өөрийн байгууллага болон харьяалах эрүүл мэндийн байгууллага, цэцэрлэг, сургуулийн эмч, эмнэлгийн мэргэжилтнүүдэд сургалт зохион байгуулж, хүүхдийн эрүүл мэндийн урьдчилан сэргийлэх, эрт илрүүлгийн үзлэгийг нэгдсэн аргачлалын дагуу хэрэгжүүлэхэд дэмжлэг үзүүлэх боломж бүрдэж байна.

   Ийнхүү сургагч багшийн тогтолцоог бий болгосноор хүүхдийн эрүүл мэндийн эрсдэлийг эрт илрүүлэх мэдлэг, ур чадварыг орон нутаг бүрд үе шаттай түгээж, урьдчилан сэргийлэх тусламж, үйлчилгээний тогтолцоог бэхжүүлэх ач холбогдолтой юм.

   Цаашид хүүхдийн эрүүл мэндийн эрсдэлийг эрт илрүүлж, шаардлагатай тусламж, үйлчилгээнд цаг алдалгүй холбон ажилласнаар өвчнийг хүндрэхээс нь өмнө хянах, эмчилгээний үр дүнг сайжруулах, урт хугацаанд эрүүл мэндийн хүндрэлээс сэргийлэх боломж бүрдэх юм.