Баянгол дүүргийн V, VI хорооны тодорхой байршилд коронавируст халдвар голомтлон гарсантай холбогдуулан хэсэгчлэн хааж, халдварыг тандах, илрүүлэх шинжилгээг энэ сарын 8 буюу өнөөдөр өглөөний 06:00 цагаас эхлэн зохион байгуулж байна.

Энэ хүрээнд явуулын 46 баг дээрх хороодын 20 мянга гаруй иргэнийг PCR-ийн шинжилгээнд хамруулах бөгөөд эрүүл мэндийн байгууллагын 230 ажилтан, цагдаа болон онцгой байдлын 236 алба хаагч ажиллаж байна.

Халдварыг тандах, илрүүлэх шинжилгээг өнөөдрөөс эхлэн амралтын өдрүүдэд зохион байгуулж, хязгаарлалтын дэглэмийг цуцлах юм. Үүнтэй холбогдуулан бусад дүүрэгт ажиллаж байгаа шинжилгээний цэгийн тоог багасгаж, дүүрэг тус бүрт нэг цэг ажиллуулна. Иймд иргэдийг шаардлагагүй тохиолдолд шинжилгээний цэгүүдэд очиж, ачаалал үүсгэхгүй байхыг анхааруулж байна гэж Эрүүл мэндийн яамнаас мэдээллээ.

БУСАД ДҮҮРЭГТ АЖИЛЛАЖ БАЙГАА ШИНЖИЛГЭЭНИЙ ЦЭГ:

• Баянзүрх дүүрэг: 142 дугаар сургууль
• Сонгинохайрхан дүүрэг: Есдүгээр сургууль
• Сүхбаатар дүүрэг:  58 дугаар сургууль
• Хан-Уул дүүрэг: Долдугаар сургууль
• Чингэлтэй дүүрэг: 39 дүгээр сургууль
• Баянгол дүүрэг: 13 дугаар сургууль.