Эрүүл мэндийн яам, ХӨСҮТ-өөс коронавируст халдварын нөхцөл байдлын талаар ээлжит мэдээллээ хийсэн. Энэ үеэр “Эргэлт.мн” мэдээллийн сайт дараах асуултуудад харилт авлаа.

-Коронавируст халдварын голомтод ажиллаж буй эмч нарын хүрэлцээ хэр байгаа вэ. Гадаад болон дотоодоос сайн дураараа ажиллах хүсэлт тавьсан эмч бий юү. Хэрэв байгаа бол тэдгээр эмчийг ажиллуулах боломжтой юу?

-Одоогийн түвшинд эмч, сувилагч зэрэг эрүүл мэндийн байгууллагын ажилтны хүрэлцээ, хангамж байгаа. Мөн өндөр настны тэтгэвэрт гарсан болон сайн дураараа ажиллах хүмүүсийн бүртгэл, судалгаа бий. Эдгээр хүнийг үе шаттайгаар сургах арга хэмжээг Эрүүл мэндийн яамнаас авч байгаа. Коронавирус нэг, хоёр сар, магадгүй нэг жилийн асуудал биш учир бид цаашид коронавирустэй дасан зохицож амьдрах шаардлагатай. Тиймээс эрүүл мэндийн байгууллагын ажилчдын хүний нөөц хамгийн чухал. Тэгэхээр хүний нөөцөө бэлдэж, давтан сургах шаардлагатай байгаа. Мэдээж коронавирустэй тэмцэх, сэргийлэх арга хэмжээнд нэг, хоёр удаа суралцаад ажиллахад хэцүү. Наад зах нь халдвар хамгааллын хувцсыг өмсөж, тайлахаас эхлээд нэлээд дадлага хэрэгтэй. Тийм учраас одоогийн нөхцөлд онлайнаар сургалт хийж байна. Одоогийн байдлаар гадаад, дотоодоос эмч нар сайн дураараа ажиллах хүсэлт ирүүлээгүй байна.

-Коронавирусийн халдвар аваад эмчлэгдээд, эмнэлгээс гарсан иргэд гэрийн тусгаарлалтад шилжиж байгаа. Гэрийн тусгарлалтад шилжсэн иргэн тусгаарлалтын дэглэмээ журмынх нь дагуу мөрдөж байгаа эсэхэд яаж хяналт тавьж байгаа вэ?

-Гэрийн тусгаарлалт 14 хоногийн хугацаатай. Эдгэрээд гарсан хүн ямар ч аюулгүй, халдваргүй. Гэхдээ дэлхий дахинд олон судалгаа байгаагаас Египетэд нэг иргэн эдгэрээд гарснаас хойш 40 гаруй хоногийн дараа дахин өөр төрлийн мутацид орсон коронавируст халдвараар өвчилж, амь насаа алдсан. Энэ нь олон улсад бүртгэгдсэн гурав дахь тохиолдол гэх мэдээлэл байгаа. Тэгэхээр эдгэрээд эмнэлгээс гарсан хүмүүс дахин өөр төрлийн коронавирусээр өвчлөх эрсдэлтэй гэдгийг олон улсын судалгаа харуулж байна. Мөн эмнэлгээс гараад гэрийн тусгаарлалтад шилжсэн иргэний гэр бүлийн хүмүүс тухайн иргэнээс айж, цэрвэх зүйл байхгүй. Гэхдээ коронавирус бол халдварт өвчин учир эдгэрээд эмнэлгээс гарсны дараа мөрдөх дэглэм байдаг. Түүний дагуу халдвар аваад эдгэрсэн хүн  болон гэр бүлийнх нь хүмүүс ямар дэглэм мөрдөх тухай заавар, зөвлөмж өгч байгаа.