Эрүүл мэндийн яамнаас коронавируст халдварын нөхцөл байдлын талаарх ээлжит мэдээллээ өглөө. ХӨСҮТ-ийн Тандалт судалгааны албаны дарга А.Амбасэлмаа “Өчигдөр буюу арванхоёрдугаар сарын 22-нд ХӨСҮТ-ийн вирус судлалын гурван лаборатори болон орон нтгийн лабораториудад нийт 4131 хүний сорьцод шинжилгээ хийсэн. Үүнээс 57 иргэний шинжилгээний хариу эерэг гарч, халдвар илэрлээ. Эдгээр тохиолдлын 55 нь БЗД-ийн Нэгдсэн эмнэлгийн голомтоос, хоёр нь Сэлэнгэ аймаг болон Цэргийн төв эмнэлгийн эмчээс илэрсэн.

55 тохиолдлын 43 нь өвчтөн, ес нь сахиур, нэг нь тус эмнэлгийн захиргааны ажилтан, үлдсэн нь халдвартай иргэний гэр бүлийн гишүүн болон энэ сарын 14-нд эмнэлгээс гарсан иргэн байна.

БЗД-ийн халдварын голомтоос одоогийн байдлаар нийт 131 хүн халдвар аваад байна” гэв.

Ингэснээд коронавируст халдварын нийт батлагдсан тохиолдол улсын хэмжээнд 1063, дотоодод 600 боллоо. Үүнээс Улаанбаатар хот дахь нийт халдварын тоо 274 байна. Улсын хэмжээнд батлагдсан нийт тохиолдлоос 541 нь эдгэрсэн бол Цэргийн төв эмнэлэг, ХӨСҮТ, Сэлэнгэ аймаг дахь нэгдсэн эмнэлэгт нийт 516 иргэн эмчлэгдэж байна. Үүнээс биеийн байдал маш хүнд нэг иргэн байгаа аж.