ЭМЯ, ХӨСҮТ-өөс коронавируст халдварын нөхцөл байдлын талаарх ээлжит мэдээллэ хийх үеэр Баянзүрх дүүрийн Онцгой комисс оролцож, үүссэн нөхцөл байдлын талаар мэдээлэл өглөө. Тус дүүргийн нэгдсэн эмнэлэгт үүссэн голомтод 449 хүн байснаас хүүхэд, ахмад настан зэрэг тодорхой тооны иргэдийг тусгаарлах байр руу шилжүүлжээ.

БЗД-ийн нэгдсэн эмнэлэгт бүртгэгдсэн халдварын нийт тохиолдол 62 болоод байгаа бөгөөд үүний 12 нь эмч, эмнэлгийн ажилтан, зургаа нь сахиур, найм нь энэ сарын 11-16-ны хооронд эмчилгээ хийлгээд гэртээ гарсан иргэд байна. Харин үлдсэн нь эмнэлэг доторх хүмүүс аж.

Энэ талаар ХӨСҮТ-ийн Тандалт судалгааны албаны дарга А.Амбасэлмаа “БЗД-ийн Нэгдсэн эмнэлэгт эмчлэгдээд гарсан найман иргэнээс коронавирусийн халдвар илэрсэн. Эдгээр иргэнийг урьд нь халдвар авч байсан эсэхэд давхар шинжилгээ хийж, гэр бүлийн хүмүүс болон ойрын хавьтлуудыг тусгаарласан. Эдгээр иргэн олон хүн цугладаг газар, зах, худалдааны төвөөр явсан гэх мэдээлэл байхгүй. БЗД-ийн эмнэлэгт нийт батлагдсан тохиолдлын 1136 иргэнийг тусгаарлаад байна. Үүнээс ойрын хавьтал 622 хүнийг эмнэлэг болон тусгаарлан ажиглах байранд тусгаарласан. Нийт батлагдсан 62 тохиолдлын 46 нь эхний шинжилгээгээр илэрсэн бол 16 нь давтан шинжилгээнд халдвар илэрсэн байгаа. Өвчтөнүүд Цэргийн төв эмнэлэгт эмчлүүлж байна. Мөн эмнэлгээс гарсан 300 гаруй хүн бий. Тэдгээр иргэнд тандалт судалгаа хийж байна” гэв.

Батлагдсан тохиолдлуудыг гэрийнх нь хаягаар ангилж харвал:

• БЗД-т оршин суудаг 50
• БГД-т оршин суудаг хоёр
• Налайх дүүрэгт оршин суудаг нэг
• СХД-т оршин суудаг хоёр
• ХУД-т оршин суудаг нэг
• Чингэлтэй дүүрэгт оршин суудаг таван тохиолдол байна.

Баянзүрх дүүргийн VII дугаар хороонд мөн халдварын голомт үүсч, судалгааны баг гарган ажиллаж байгаа гэнэ. Мөн тус дүүргийн 28 хорооны 20 цэг дээр өнөөдрөөс эхлэн иргэдийг шинжилгээнд хамруулах ажлыг хийж эхэлжээ. Шинжилгээний цэг тус бүрт төв эмнэлэг, төрөлжсөн мэргэжлийн эмнэлэг, дүүргийн эрүүл мэндийн төвийн эрүүл мэндийн ажилтан, мэргэжлийн хяналтын байцаагч, цагдаагийн алба хаагч ажиллаж буй аж.