Эрүүл мэндийн яам, ХӨСҮТ, УОК-оос коронавируст халдварын тархалт, нөхцөл байдлын талаарх ээлжит мэдээллээ өгсөн. Арванхоёрдугаар сарын 5-наас хойш буюу 24 цагийн хугацаанд 14 мянга 19 хүнд шинжилгээ хийснээс долоон хүнээс халдвар илэрсэн талаар хэлсэн. Ингэснээр манай улсад батлагдсан тохиолдол 849 болж байгаа бөгөөд дотоодын халдвар 404 болж байна. Тэгвэл нийт 456 иргэн хэвтэн эмчлүүлж байгаагаас 16 нь эдгэрч, эмнэлгээс гарчээ.

ТИР машины нэг жолооч, Энхсаран сувилалаас өвчилсөн хоёр иргэн эдгэрч, эмнэлгээс гарлаа

ХӨСҮТ-ийн Тандалт судалгааны албаны дарга А.Амбасэлмаа “Сүүлийн 24 цагт ХӨСҮТ-ийн халдвартын клиникээс 16 хүн эмчлэгдэж, дараагийн сувилалд шилжлээ. Тодруулбал, шинээр бүртгэгдсэн кластер голомтын 13 хүн эмнэлгээс гарч байна. Эдгээрээс Улаанбаатар хотын долоо, Орхон аймгийн дөрөв, Сэлэнгэ аймгийн нэг, Дорноговь аймгийн нэг хүн байна. ТИР машины нэг жолооч, Энхсаран сувилалаас өвчилсөн хоёр иргэн байна” гэв. Мөн улсын хэмжээнд коронавирусийн батлагдсан тохиолдол 849 байгаагаас эдгэрсэн 384, эмчлэгдэж байгаа 456 иргэн байна. Эдгээр иргэн ХӨСҮТ-ийн клиник, Цэргийн төв эмнэлэг, Сэлэнгэ аймгийн нэгдсэн эмнэлэгт эмчлэгдэж байгаа бөгөөд биеийн байдал хөнгөвтөр 382, хүндэвтэр 68, хүнд дөрөв, маш хүнд хоёр иргэн хэвтэн эмчлүүлж байна. Биеийн байдал маш хүнд байгаа хоёр иргэний хувьд 56 болон 81 настай иргэн. Биеийн байдал нь тогтвортой байна.