Сурах бичгийн хүрэлцээ муу байгаагийн улмаас сурагчдад сугалаагаар ном олгож байгаа гэх мэдээлэл гараад байгаа билээ. Энэ талаар БСШУСЯ-ны Бага, дунд боловсролын газрын мэргэжилтэн П.Наранжаргалаас тодрууллаа.

-Сурах бичгийн хүрэлцээ хангалтгүй байгаагаас үүдэн сурагчдад сугалаагаар ном олгож байна гэх асуудал яригдаж эхэлсэн. Энэ талаар мэдээлэл өгөхгүй юү?
-БСШУС-ын яаманд сурах бичгийг сугалаагаар олгож байгаа гэсэн мэдээлэл ирээгүй. Хэрэв үнэхээр сугалаагаар олгосон байх юм бол яг аль сургуулийн хэддүгээр ангид, ямар хичээлийн ном дутагдсан байна гэдгээс хамаарч зохицуулалт хийнэ. Энэ талаар дүүргүүдийн Боловсролын газар мэдээлэл өгөх ёстой. Түүнээс биш сурах бичгийг сугалаагаар олгоно гэсэн зүйл байхгүй.

Гэхдээ Баянзүрх дүүргийн Ерөнхий боловсролын сургуулиудад сурах бичгийн хүрэлцээ муу байх тал байдаг. Учир нь, мэргэжилтнүүд нь ойр ойрхон солигддог гэх зэрэг тухайн сургуулийн менежмент, зохицуулалттай холбоотой асуудал гардаг.

-Хэрэв сурах бичгийг сугалаагаар олгож буй нь үнэн байх юм бол тухайн сургуулиудийг нөхөн хангалтын сурах бичгээр хангах боломжтой юу? 
-Хэрэв нийслэлийн есөн дүүрэг, 21 аймгийн Боловсролын газраас ийм ном дутуу, хэрэгтэй байна гэх юм бол яамнаас нэгдсэн байдлаар нөхөн хангалтаар хэвлэж өгнө. Түрээсийн сурах бичгийн хүрэлцээ сайн байгаа. Ерөнхий боловсролын сургуулиудад сурах бичиг дутагдана гэсэн асуудал гарахгүй гэж харж байна. Гэхдээ сургууль болгонд хангалт нь янз бүр байдаг. 

-Ерөнхий боловсролын сургуулийн нэг ангид хэчнээн сурах бичиг хуваарилагдсан бэ? 
-Зарим сургуульд 50-60 хүүхэдтэй анги байгаа. Тухайн сургуулийн хэмжээнд хэчнээн хүүхэд суралцаж байна түүнээс хамаараад янз бүрээр хуваарилагдсан. VI-XII ангийн нийт хүүхдийн 60 хувьд нь түрээсийн сурах бичиг, үлдсэн 40 хувьд нь улсаас үнэгүй сурах бичиг олгож байгаа. Харин I-V ангийн сурах бичгийг 100 хувь хангадаг. Анги дүүргэлт ихтэй сургуулиудын сурах бичгийн хүрэлцээний асуудлыг тухайн сургуулийн харьяа дүүргүүдийн Боловсролын газар зохицуулалт хийж, хариуцаж ажиллах ёстой.

Тодруулбал, харьяа сургуулиудаасаа ямар ном дутуу, ямар ном илүү байгаа талаарх судалгаа, тоог гаргаж зохицуулалтаа хийнэ гэсэн үг.