• Өнөөдөр 2024-03-29

Үхэл амьдралын зааг дундуур найзыгаа үүрч алхсан эрэлхэг хөвгүүн Ч.АЛТАНШАГАЙ

2022-02-05,   8605

          “Найзыгаа үхчих вий гэж айхдаа уйлсан. Тэгээд үүрэх газраа үүрээд, чирэх газраа чирсээр арай гэж айлын бараа харсан” хэмээн ярих Ч.Алтаншагай бол дотнын найзыгаа осгож үхэхээс аварсан ачтан. Энэ явдал өдгөөгөөс сар гаруйн өмнө Хөвсгөл аймгийн Улаан-Уул сумын нутагт болжээ. 

            Зургаан насны зөрүүтэй ч зүү орох зайгүй шахам үерхэж, нөхөрлөдөг Б.Эрхэмбилэг, Ч.Алтаншагай нар нэгэн үдэш бэлчээрт гарсан малаа цасан шуурга тавихаас өмнө гэр рүүгээ дөхүүлэхээр явцгааж. Тэнгэр хангай хуйсагнан харанхуйлж, цас бударч эхэлжээ. Гэвч хэсэгхэн яваад нүүр нүдгүй шуурах цасан шуурганд хөвгүүд төөрч, зүгээ алдсан байна. Дархадын хотгорт -50 хэмийн хүйтэн тачигнаж, хөвгүүд бээрч, алхаж болж байгаа зүг рүүгээ л яваад байсан аж. Нэлээн явсны дараа Б.Эрхэмбилэгийн хөл цуцаж, даарсандаа осгож эхэлжээ. Бүр хоёр хөл нь мэдээ алдаж явж чадахгүй сөхрөөд суучихсан байна. Хэсэгхэн суусны дараа “Би босож чадахгүй байна” гээд цасан дээр хэвтээд өгч.

          Найздаа “Намайг орхиод яв. Би эндээ жаахан унтчихаад босохгүй бол явж чадахгүй байна. Тэгээд араас чинь гүйцээд очно” гээд хэвтээд байжээ. Энэ үед Ч.Алтаншагай “Хөлдөж, осгож байгаа хүн унтах гээд байдаг. Унтуулж болохгүй, хөдөлгөж, болж өгвөл алхуулах хэрэгтэй” гэж Эрүүл мэндийн хичээл дээр үзэж байснаа санаж түүнийг өргөж, босгоод алхуулах гэж оролдсон байна.

          Өөрөөс нь зургаан насаар дүү хэрнээ хэнээс ч дутахааргүй түшиг болж, сайн муу бүхнээ хуваалцдаг найзыгаа алхуулах гэж хэчнээн оролдоод дийлээгүй тул үүрээд хэсэг алхсан гэнэ. Биеэр бараг чацуу тул найзыгаа дийлэхгүй хөр цасанд дунд хамтдаа унаж, дахин босгож үүрсээр сүүлдээ тамир нь барагдаж, өөрөө ч хөдөлж чадахгүй болтлоо бээрсэн байна. Цасан дээр унаснаас болж хамаг хувцас нь норж, сүүлдээ мөстөж эхэлсэн гэнэ. Цас нүүр нүдгүй шуурч, ойр хавийн юу ч огт харагдахгүй байсан аж. Голд нь хүйт орон даарч чичирч эхэлсэн байна. Гэсэн ч хүү цаг агаарын аюулт үзэгдэл болсон цасан шуургыг сөрж явжээ.  “Чирээд ч болтугай найзыгаа аваад явна” гэж бодоод мөрнөөс нь хэсэг чирж, хэдхэн минут амраад дахин үүрч, ядрахаараа чирсээр нэгэн айлын гадаа ирсэн байна.

       Цасан шуурга балбаж байгаа учир айлынхан гэрээсээ гарах нь битгий хэл нохой нь ч хуцах сөхөөгүй дулаан хэвтэртээ шигдэж байсан учир Ч.Алтаншагай найзыгаа чирсээр айлын үүдэнд очоод унаад өгч. Үүдэнд нь юм дуугарах чимээнээр гэрийн эзэд хаалгаа нээвэл хоёр жаахан хүү үхлүүт шахуу хэвтэж байж. Гэрийн эзэд хүүхдүүдийг гэрт оруулан архиар биеийг нь үрж, сумын төвийн эмнэлэг рүү дуудлага өгсөн байна. Үүнтэй зэрэгцэн тэнгэр хангай цэлмэж, хууд нь хийсгэх нь үү гэмээр тачигнаж байсан шуурга намжиж, сумын эмч, хүний гавьяат эмч О.Пүрэвсүрэн ч цаг алдалгүй ирсэн байна. Тэдний төөрч явсаар айлд хүрсэн замыг нутгийнхан нь барагцаалаад “Тэд арав гаруй километрийг алхаж, нэгнийгээ үүрч, чирсээр туулсан байна” гэж ар гэрийнхэнд нь хэлсэн байна. Цасан шуурганд осгож үхэх аюулаас найзыгаа аварсан энэхүү баатарлаг явдлыг “Бидний цөөхөн монголчууд” төслийн багийнхан Хөвсгөл аймагт ажиллах үеэрээ олж сонсон, бүр хэрэг болгон хөвгүүдтэй очиж уулзсан аж.

Найздаа “Намайг орхиод яв. Би эндээ жаахан унтчихаад босохгүй бол явж чадахгүй байна. Тэгээд араас чинь гүйцээд очно” гээд хэвтээд байжээ

          Энэ үеэр Ч.Алтаншагайгаас төслийн багийнхан “Цасан шуурга шуурч байхад найзыгаа үүрээд, чирээд явж байхдаа чи айсан уу. Бас өөрөө тамиргүй болоод хоёулаа хамт үхэх вий гэж бодсон уу”  хэмээн асуухад  “Би юунаас ч айгаагүй. Эрүүл мэндийн хичээл дээр даарч, хөлдөж, осговол хөдөлгөөнгүй хэвтэж, сууж болохгүй. Ямар ч байсан хөдлөх ёстой гэж заасныг санаж байсан учраас хөдлөх л хэрэгтэй гэж бодсон. Гэхдээ үүнээс илүү “Найзыгаа үхчихвэл яана аа” гэж бодоод уйлсан. Одоо бид хоёр хоёулаа эрүүл саруул хичээлдээ яваад, хамт малдаа яваад өмнөхөөсөө ч илүү сайн найзууд болсон. Биднийг төөрөх үед ээж, аавууд маань сумын төвөөр нэг хайгаад сандарч байсан байна лээ” гэж хариулсан байна.

       Харин хөвгүүдийн биеийн байдлын талаар О.Пүрэвсүрэн эмч “Эрхэмбилэгийн хөлийн дөрвөн хуруу хөлдөж, тайрахаас аргагүй болж тайрсан. Бусдаар түүний бие сайн. Мөн найзынхаа амийг өөрийнхтэйгээ аварсан Алтаншагайгийн хөлийн өсгий хөлдсөн байсан. Эмчилгээ хийгээд одоо эдгэрсэн. Энэ хоёр хүү тэр хол замыг энэ зэрэгтэй туулсан нь их юм” хэмээн төслийн багийнханд ярьсан байна. Б.Эрхэмбилэг өдгөө Улаан-Уул сумын ерөнхий боловсролын сургуулийн зургадугаар ангид сурдаг бол Ч.Алтаншагай арваннэгдүгээр ангийн сурагч юм байна.

     Хөвч тайга Хөвсгөл нутагт Ч.Алтаншагай хамтдаа эмнэг даага сургаж, хонины бэлчээрт унасан мориороо уралдаж өссөн найзынхаа амь насыг ийн аварсан байна. Тэр эрэлхэг гавьяа байгуулж, эрдэнэт хүмүүний амь насыг аварч чаджээ. Үхэл амьдралын зааг, нүдгүй шуурах цасан дундуур найзыгаа үүрэн алхсан хүүгийн бахдам түүхийн зах зухаас уншигч та бүхэнд хүргэлээ.

Цасан шуурга балбаж байгаа учир айлынхан гэрээсээ гарах нь битгий хэл нохой нь ч хуцах сөхөөгүй дулаан хэвтэртээ шигдэж байсан учир Ч.Алтаншагай найзыгаа чирсээр айлын үүдэнд очоод унаад өгч. Үүдэнд нь юм дуугарах чимээнээр гэрийн эзэд хаалгаа нээвэл хоёр жаахан хүү үхлүүт шахуу хэвтэж байж

2017 он


Үхэл амьдралын зааг дундуур найзыгаа үүрч алхсан эрэлхэг хөвгүүн Ч.АЛТАНШАГАЙ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 17
  • Сэтгэгдэл үлдээсэн: 2023-06-06 09:36:14
    Зочин: Нэгийгээ чирээд үүрээд явж байгаа тэр хүү бол ЗҮЙРЛЭХИЙН АРГАГҮЙ БААТАРЛАГ ХҮҮ ШҮҮ.ТЭР ХҮҮД ЁСТОЙ ШУДРАГА ШУРАМ МЕДАЛ ХЭРЭГГҮЙЭЭ УЛСЫН БААТАР ЦОЛ ӨГӨХ ХЭРЭГТЭЙ. ЯГ ҮНЭНИЙГ ХЭЛЭХЭД ЧИРҮҮЛЖ ҮШРҮҮЛЖ ЯВАА ХҮҮ БОЛ ТЭР ҮЕДЭЭ НАЙЗЫГАА ТАМЛАГЧ ШҮҮДЭЭ
  • Сэтгэгдэл үлдээсэн: 2023-06-06 09:30:21
    Зочин: Пэээ ямар мундаг юм бэ цасан шуурганаар нэгийгээ үүрээд чирээд явна гэдэг ёстой үнэн аймшиг шүүдээ зүгээр л цасан шуурга чинь хүн үүрээд,чирээд явах байтугай өөрийгөө яая гэж явдаг юм шүүдээ урдаас ямар ширүүн хатуу хүйтэн цасаар нүдчихдэг гээч бузар хүйтэн хатуу харгисаар нүдээл бна шүүдээ .Ёстой мундаг хүүхэд юмаа.Юун тэсвэр хатуужил ,хүн чанар вэ, тийм үед чинь амьд гарах л ганцхан хүсэл ургаш нь яаравчлан түлхдэг юм.Ямар аймшиг, ямар хүнд ,ямар айдас, ямар хүч хүнд ирдэг гээч зүгээр ч нэг үгээр магтах уянгалуулах биш аюулын харанга яг хажууд зэрэгцээд явж байхад ёстой хэлэхийн аргагүй ярихын аргагүй ганцаараа зүтгэдэг амьд үлдэх цор ганц бодол л хань болдог юмдаа хүмүүс минь даан ч бэрх үе бол амьдрахын төлөө алхам бүр үнэтэй тэр мөч хэлэхийн аргагүй тэмцэл.Энэ хүүхдүүд мундаг жинхэнэ БААТАРУУД
  • Сэтгэгдэл үлдээсэн: 2022-02-05 10:43:34
    Зочин: Мундаг хүүхдүүд бна
  • Сэтгэгдэл үлдээсэн: 2021-12-22 12:31:51
    Бид Сономыххон: Аварсан хүүг шударга журам мeзалиар шагнаж Олон улсын Найрамдал зусланд амрах эрхээр шагна Хоёулангийн ньСоном шагна гэж туйлширхаа боль Монголчууд аа
  • Сэтгэгдэл үлдээсэн: 2021-12-22 11:33:44
    pagamsurenpaagii: Хүний мөс муудсан энэ зэвүүн цагт хүн чанар андийн нөхөрлөлийн эрхэм чанарыг бататган харуулж зориг самбайтай тэвчээр гаргаж найзынхаа амийг аварсан ухаалаг хүү чамдаа талархал дэвшүүлье. Та хоёрт сайн сайханыг хүсье он удаан жил үерхэж бие биенээ үргэлж хайрлан хүндэтгэсэн сайхан найзууд яваарай
  • Сэтгэгдэл үлдээсэн: 2021-12-22 09:46:13
    Санжмятав Цэнгэлмаа: Хөхөө өвлийн хүйтэнд хүүхүүдээ малд гаргадаг эцэг эхчүүдэд хариуцлага тооцох хэрэгтэй... Тэд маань хүүхэд шүү дээ... Аймаар бөх зүрхээ...
  • Сэтгэгдэл үлдээсэн: 2021-12-22 08:37:38
    Ганзориг: Баатарын шагнал багадхааргүй хүүхдүүд байна.
  • Сэтгэгдэл үлдээсэн: 2021-12-22 07:26:25
    Зочин : Монгол хүний тэвчээр гэж ийм л агуу шүү мундаг тэвчээр хатуужилаар найзынхаа амийг аварсан хүүд баяр хүргэж эрүүл энх сайн сайханыг хүсэн ерөөе
  • Сэтгэгдэл үлдээсэн: 2021-12-22 06:37:58
    зочин : 2 хөөрхөн хүүд баяр хүргэж аз жаргал хүсье шударга журам медиалаар 2 ууланг нь шагнаасай
  • Сэтгэгдэл үлдээсэн: 2021-12-22 01:18:16
    Алтан цэцэг: Мундаг тэсвэртэй сайн хүү бна найзыгаа болон өөрийнхөө амийг аварсан Маш сайн байна
  • Сэтгэгдэл үлдээсэн: 2021-12-21 21:32:21
    монгол: Мундаг мундаг манай нутгынхан дайны үед ч ингэж байсан юмаа.
  • Сэтгэгдэл үлдээсэн: 2021-12-21 21:30:18
    Monherdene : Mash mundag hvvd bayr hvrgie
  • Сэтгэгдэл үлдээсэн: 2021-12-21 21:29:52
    Monherdene : Mash mundag hvvd bayr hvrgie
  • Сэтгэгдэл үлдээсэн: 2021-12-21 20:45:07
    Narmandah: Mundag huvgvvdee im saihan hvmvvjvvlsen aav eej bolon bagsh nart ni bayr hvrgeye baharhaj bna
  • Сэтгэгдэл үлдээсэн: 2021-12-21 20:36:57
    Зочин: Сэргэлэн, сэтгэлтэй саыхан хөвүүд байна. Бие биенээ түшиж нөхөрлөөрэй. Бахархам хөвүүдээ.
  • Сэтгэгдэл үлдээсэн: 2021-12-21 18:19:44
    маш сайн хуухэд: сайн хуу байна даа.маш их баярлалаа.еерийгее боон найзыгаа авардаг
  • Сэтгэгдэл үлдээсэн: 2021-12-21 16:32:45
    zochin: mundag chuu bna. Duudee eruul ench urt udaan naslachiig chusen erooe
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188