Зэвсэгт хүчний 123 дугаар ангийн ахлах ахлагч Э.Даваажамц дөрвөн өдөр гүйж байгаа тухайгаа Ховд аймгийн Зэрэг сумаас мэдээлэл хийсэн юм. Тэрбээр “Би дөрөв дэх өдрөө гүйж байна. Одоо Ховд аймгийн Зэрэг сумын Хөдөө нуурын захад амарч байна. Зэрэг суманд ирээд удаагүй байтал Зэрэг сумын ЗДТГ-ын хамт олон болон сургуулийн багш нар угтаж авсан. Та бүхэндээ маш их баярлалаа. 16:00 цагаас Дарви сум руу 23 км гүйнэ.

     Цаг агаар тогтуун байгаа учир төлөвлөгөөний дагуу өдөрт 40-45 км гүйж байгаа. Маргааш орой Дарви суманд очиж хонох төлөвлөгөөтэй. Энэ сарын 12-нд Говь-Алтай аймаг орно гэсэн бодолтой байгаа. Биеийн байдал хэвийн, ямар нэгэн асуудал гараагүй. Тийм учраас гүйхэд хүндрэлтэй зүйл одоогоор байхгүй байна. Монголынхоо үзэсгэлэнт сайхан байгалийг үзэж, сайхан явж байна. Амжилт хүсэж байгаа хүнд баярлалаа” гэлээ.