Төв аймгийн Сэргэлэн сумын нутаг, Улаанбаатар-Хөшигийн хөндийн олон улсын шинэ нисэх онгоцны буудал чиглэлийн 32.2 км хурдны автозам барьсан. Тус зам  хоёр урсгал бүхий зургаан эгнээтэй бөгөөд хоёр жилийн өмнө ашиглалтад орсон ч машин огт яваагүй, хаалттай байсаар саяхныг хүрсэн юм.

      Машин яваагүй хэрнэ тус замын голд үргэлжилсэн их хэмжээний цууралт үүссэн зураг цахим орчинд тархаад байна. Машин яваагүй шинэ зам юунаас болж хагарсан талаар Зам, тээврийн хөгжлийн сайд Л.Халтараас тодрууллаа. Тэрбээр “Тус зам юунаас болж хагарч, эвдэрснийг тогтоохоор ажлын хэсэг гарсан. Өнөөдөр тус зам дээр ажиллаж байгаа. Нэгдсэн дүгнэлт гарахаар албан ёсоор мэдээлэл өгнө” гэлээ.

      Тус хурдны замыг БНХАУ-ын Засгийн газрын хөнгөлөлттэй зээлийн хөрөнгөөр барьсан аж. Барилгын ажил гүйцэтгэх гэрээг Зам, тээврийн хөгжлийн яам болон БНХАУ-ын “Чайна тэйсэжү сивил инженеринг групп” ХХК-ийн хооронд 2015 оны есдүгээр сарын 18-ний өдөр байгуулсан байдаг.

     Улмаар барилгын ажлыг 2016 оны зургаадугаар сарын 6-нд эхлүүлж, туслан гүйцэтгэгчээр үндэсний аж ахуйн нэгжүүд болох “Бадрах ойл” ХХК, “Эрдэнэ зам” ХХК, “Арж Капитал” ХХК ажилласан байна. Уг төслийн ажлын нийт өртөг нь 140.3 сая ам.доллар бөгөөд барилгын ажлыг гурван жилийн хугацаанд гүйцэтгэж, 2019 оны долдугаар сарын 3-нд улсын ашиглалтад оруулсан юм.