Дархан-Уул аймгийн Дархан сумын есдүгээр баг, Хээтэй хорооллын 4-2 байрны тавдугаар орцны оршин суугчид нийлж орцондоо иж бүрэн засвар хийж байна. Тус байрны оршин суугч М.Жанлав орцныхоо давхар бүрд оршин суугчдын санал хүсэлтээр өнгөлөг, гоёмсог зургуудыг сэтгэлээ шингээж зурж буй юм. Иргэн М.Жанлавын санаачилсан ажил хэрхэн үргэлжилж байгаа талаар тодрууллаа.

-Таны эхлүүлсэн ажил хэрхэн үргэлжилж байна вэ. Байрныхаа давхар бүрд зураг зурж, засварлах ажлыг хэзээнээс санаачилсан бэ?

      -Манай байр таван давхар. Одоо гурван давхарт зургаа зурж байна. Би эртнээс л зураг зурж, тохижуулах юм сан гэж боддог байлаа. Харин сая бодлоо биелүүлж айл бүрээс 200 мянган төгрөг цуглуулж, засвараа хийж байгаа. Манай байр 14 айлтай.

-Таны зурсан зургуудыг цахим орчноос харсан. Их сайхан зургуудаар ханаа тохижуулж байна лээ. Та ямар мэргэжилтэй вэ?

     -Би Дүрслэх урлагийн багшаар 18 дахь жилдээ ажиллаж байна. Манай байрныхан хөршийн харилцаа сайтай, сагс, гар бөмбөг тоглодог, тамирчид амьдардаг. Би иргэдийнхээ үзэл бодол, санал санаачилгад үндэслэн зураг зурж байгаа.

-Та хэдүүлээ ажиллаж байгаа вэ?

     -Дөрвүүлээ ажиллаж байна. Бусад маань хана цэвэрлэх, бусад бэлтгэл ажлыг хариуцаж хийж байна.

-Танай байрныхан болон хүүхдүүд хэрхэн хандаж байна вэ?

     -Зургаа үнэргүй будгаар будаж байгаа. Хөршүүд маань урмын сайхан үг хэлж байгаа. Хүүхдүүд их баярлаж, догдолж, “Би будъя, зуръя” гээд гүйгээд ирдэг. Тийм учраас нэгдүгээр давхарт хүүхдүүдээр зураг зуруулж, будуулах тусгай булан гаргана гэж бодож байгаа. Манай байрны тохижилтын ажил долоо хоногийн дараа дуусна. Гадна талыг нь долдугаар сард янзална гэсэн.