Өчигдөр О.Мөнхтөр гэх иргэн Сүхбаатарын талбайн дэргэдэх цэцэрлэгт түргэн хоол идэж байгаад 10 мянган төгрөгөөр торгуулсан тухайгаа цахим хаягтаа нийтэлж, түүнийг нь уншсан иргэд зөрчлийн тухай хууль болон цагдаагийн байгууллагын хандлагыг эсэргүүцэж эхэлсэн. Тэгвэл өнөөдөр ЦЕГ-ын Хэвлэл мэдээллийн төвөөс уг мэдээлэл нь "худал мэдээлэл" гэх тайлбар гаргажээ. Тухайлбал “СБД-ийн 6 дугаар хороо Сүхбаатарын талбайн урд талын цэцэрлэгт хүрээлэнд өчигдөр 17:00 цагийн үед иргэн Э.Б гэгч нь олон нийтийн газарт хог хаясан үйлдэл гаргасан тул Зөрчлийн тухай хуулийн 5.1 дүгээр зүйлийн 1 дэх хэсэгт заасны дагуу 10 нэгжээр торгох шийтгэл оногдуулсан байна. Олон нийтийн цахим сүлжээнд мэдээлэл оруулсан иргэн О.М гэгч нь зөрчил үйлдсэн иргэнтэй хамт байсан бөгөөд хоол идсэн гэх үндэслэлээр цагдаагийн алба хаагч иргэнд шийтгэл хүлээлгэсэн гэх үндэслэлгүй ташаа мэдээлэл түгээсэн болох нь шалгалтын явцад тогтоогдсон. Хуулиар хүлээсэн үүргээ биелүүлж, зөрчил үйлдсэн этгээдэд хуульд заасан шийтгэл оногдуулсныг олон нийтэд бодит бус байдлаар мэдээлэл түгээсэн тухайн иргэнийг Зөрчил шалган шийдвэрлэх тухай хуульд заасны дагуу үргэлжлүүлэн шалгаж байгаа болно" гэх мэдэгдэл гаргажээ. Чухам яагаад 10 мянган төгрөгөөр торгуулсан талаар О.Мөнхтөрөөс тодрууллаа.

-Та Сүхбаатарын талбайн дэргэдэх цэцэрлэгт хоол идэж байгаад 10 мянган төгрөгөөр торгуулсан юм уу, хог хаясан болохоор торгуулсан юм уу?

     -Би өнөөдөр Сүхбаатар дүүргийн Цагдаагийн нэгдүгээр хэлтэст очиж, хэлтсийн дарга болон өчигдөр намайг торгосон цагдаатай уулзлаа. Өчигдөр намайг торгосон цагдаа "Таныг хог хаясан учраас торгосон" гэж гүтгэж байна. Үүнийгээ "Намайг та хоёр дээр очиход “Хот дог”-ны цаас чинь газар байсан учир би торгосон” гэж тайлбарлаж байна. Тэгэхээр нь “Би хог хаяагүй. Энгэрийн камерынхаа бичлэгийг үзүүлж болох уу” гэлээ. Гэтэл “Камер байнга ажиллах албагүй. Зай хураагуур цэнэггүй болдог" гэж дарга нь хэлж байна. Тэгээд ойлголцож чадалгүй маргалдаж байгаад гарч ирлээ. Бид хог хаях нь битгий хэл цагдааг ирэхэд хоолондоо хүрээгүй, өөдөөсөө хараад сууцгааж байсан.

-ЦЕГ-ын гаргасан мэдэгдэл дээр таныг хог хаясан болохоор 10 мянган төгрөгөөр торгосон гэсэн байсан. Та хоёр хог хаяагүй байсан юм бол яагаад торгуулийн мөнгөө өгсөн юм бэ?

     -Бид хоёр бичиг баримт бүрдүүлээд яаралтай ажилтай явж байсан юм. Хоолоо идчихээд хурдан явахын тулд 10 мянган төгрөг дээр хэл ам хийж цаг алдаж байснаас гээд мөнгөө өгсөн.  Гэтэл торгуулийн хуудас дээр “Хог хаясан” гээд биччихсэн байсан. Надад 10 мянган төгрөг өгч, авах нь чухал байсангүй. Хог хаяагүй байхад хаясан болгож, торгуул ногдуулж байгаа нь сонин байна.

-Та энэ асуудлыг нэг тийш нь шийдэхийн тулд шүүхэд гомдол гаргах уу?

     -Сүхбаатар дүүргийн Цагдаагийн нэгдүгээр хэлтсийн дарга намайг “Сүхбаатар дүүргийн шүүхэд гомдол гаргаж болно. Би та хоёрын хэнийх нь ч үгэнд үнэмшихгүй байна” гэсэн. Уг нь гомдол гаргамаар байна. Би хог хаяагүй байж хаясан болчихлоо. Мөн худал мэдээлэл тараасан гэж гүтгүүлж байна. Ийм зүйл байж болохгүй биз дээ. Даанч би визний материал хөөцөлдөж байгаа болохоор хажуугаар нь шүүх, цагдаагаар явах хэцүү байна. Тийм болохоор найзтайгаа ярилцаж байгаад шийднэ.