• Өнөөдөр 2021-06-21

461 дүгээр ангид хар тамхины хэргээр хоригдож байгаа Г-ны дүү Б: Ах минь хорих ангиас халдвар авсан ч хурдан эдгэрсэн байна лээ

2021-05-14,   1516

    Улсын хэмжээнд 345 хоригдол,126 баривчлагдсан этгээдээс коронавирусийн халдвар илэрсэн. Үүнээс  өнөөдрийн байдлаар 268 хоригдол эдгэрч, 75 нь эмчлэгдэж байна. Мөн баривчлагдсан бүх этгээд эдгэрсэн аж. Тухайлбал, ШШГЕГ-ын харьяа 461 дүгээр цагдан хорих ангид  хар тамхины хэргээр хоёр жил хоригдож буй Г коронавирусийн халдвараар өвчилж, эдгэрчээ. Түүний биеийн байдал ямар байгаа талаар хоригдол Г-ын дүү Б-аас тодрууллаа.

-Таны ах коронавирусийн халдвараар өвчлөөд эдгэрсэн юм билээ. Та хамгийн сүүлд хэзээ ахтайгаа уулзсан бэ?

      -Ахын минь сэтгэлзүй болон биеийн байдал ямар байгааг сайн хэлж мэдэхгүй байна. Бид 15-20 минут уулздаг болохоор нарийн зүйл ярьж чаддаггүй юм. Би анх 461 дүгээр хорих ангид коронавирусийн халдвар гарсан гэдгийг сонсоод маш их санаа зовж, айж, түгшсэн. “Ах минь гайгүй байгаасай” л гэж бодож байлаа. Гэтэл ах минь халдвар авчихсан байсан. Хөл хориотой байсан болохоор уулзах  боломж байгаагүй. Ахтайгаа өчигдөр (уржигдар) очиж уулзсан. Бие нь дээрдэж, гайгүй болсон байна лээ. Ах надад хэлэхдээ “Одоо ах нь эдгэрчихсэн. Санаа зоволтгүй, тайван байгаарай” гэж хэлсэн. Яг хэзээ халдвар авсан болон ямар эмчилгээ хийсэн талаар асууж амжаагүй. Ахуйн зүйл яриад л таарсан даа. Хатуу хөл хорионы үед халдвар авсан юм шиг байна лээ. Коронавирусийн халдвараар өвчлөөд эдгэрээгүй олон хүн байгаа шүү дээ. Бүр зарим нь нас барж байна.

Ахыг минь эмчилж, эдгээсэн 461 дүгээр цагдан хорих ангийн хамт олон, эмч нарт маш их баярлаж байгаа. Халдварыг маш хурдан хугацаанд эдгээж, халдвар хамгааллаа баримталж, хоригдол нарыг сайтар тусгаарлаж чаджээ гэж бодсон. Мөн эмч нар маш сайн ажиллаж чадсан гэж бодож байгаа. Ахыг минь ямар эмч эмчилсэн гэдгийг мэдэхгүй. Эмчилгээ эрхэлсэн тасгийнхан бүгд эмчилсэн байх л гэж бодож байна. Хэдийгээр миний ах буруу зүйл хийгээд хоригдож байгаа ч эрүүл байх ёстой. Энэ эрхийг дээдэлж, хурдан шуурхай эмчилсэн байна лээ.

-Эдгэрсэний дараа сөрөг нөлөө үлдсэн гэнэ үү. Та энэ талаар асууж чадсан боолов уу?

     -Тиймээ, асуусан. Гэтэл “Ямар нэгэн зовиур байхгүй. Хууч өвчин давхар эдгэрсэн юм шиг байна. Бие хөнгөрөөд сайхан болсон” гэсэн. Ах минь хоолойны махтай, хоолой нь өвддөг байсан юм. Одоо зүгээр болсон гэсэн. Эрхээ хасуулж, хайртай хүмүүстэйгээ хамт байж чадахгүй байгаа ч эрүүл байгаад л баярлаж сууна.

-Ах нь өрөөндөө хэдүүлээ байдаг вэ?

     -3-4-үүлээ байдаг юм шиг байна лээ.

-Таны ах ШШГЕГ-ын харьяа 461 дүгээр хорих ангид хоригдоод хэдий хугацаа өнгөрч байна вэ. Ямар хэргийн улмаас хоригдож байгаа талаар та хэлж болох уу?

      -Миний ах цагдан хорих ангид хоригдоод хоёр жил гаруй хугацаа өнгөрч байна. Хар тамхины хэргээр хоригдсон. Тухайн хэргийн талаар дэлгэрэнгүй ярих боломжгүй байна.

-Танай гэр бүлийн зүгээс шүүхийн байгууллагад хандах гомдол, санал бий юү?

      -Ахын минь хэрэг бүрэн шийдэгдэхгүй удаж байна. Шүүхэд хандахаар гайгүй мөртлөө хэрэг нь прокурор дээр очихоор бүтэхгүй болчихоод байгаа. Хэргийг нэг тийш нь шийдэж чадалгүй өнөөдрийг  хүрч байна.


461 дүгээр ангид хар тамхины хэргээр хоригдож байгаа Г-ны дүү Б: Ах минь хорих ангиас халдвар авсан ч хурдан эдгэрсэн байна лээ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, XI хороолол, 14193-Их тойруу 43, "N tower" V давхар 501-2 тоот
7713-1414