Налайх дүүргийн VI хороо “Өнөр” амралтын газрын урд голд "Ланд-100" маркийн автомашин живж, дотор нь зорчиж явсан гурван хүн усанд осолдох нөхцөл байдал үүсчээ. Дуудлагын дагуу Налайх дүүргийн Онцгой байдлын хэлтсийн дарга, хурандаа Л.Чинбатаар ахлуулсан аврах бүлгийн есөн албан хаагч ослын газар ажилласан юм. Уснаас гурван хүний амь аварсан Налайх дүүргийн Онцгой байдлын хэлтсийн дарга, хурандаа Л.Чинбаттай цөөн хором ярилцлаа. 

-Таниар ахлуулсан есөн хүний бүрэлдэхүүнтэй баг өчигдөр гурван иргэнийг усны ослоос аварчээ. Та бүхнийг очиход ямар нөхцөл байдалтай байсан бэ?

    -Иргэд өмнөх жилүүдэд гарч болж байсан гээд гарамгүй газраар гарсан байна лээ. Энэ жил гол, мөрний усны түвшин өмнөх жилүүдийнхээс нэмэгдсэн. "Ланд-100" маркийн автомашины хамар давсан гэж бодоход 1.20-1.30 см устай байсан гэсэн үг. Иргэд машин дүүрэн усанд 40 минутын турш байсан. Жаахан цаг алдсан бол тэд хэцүүдэх байдалтай байсан.

-Голд байсан гурван иргэнийг хэдий хугацаанд уснаас гаргаж чадсан бэ?

    -Бидэнд дуудлага өчигдөр 13:05 цагт ирсэн. Аврах бүлгийнхэн бүгд гадуур ажилтай явж байсан болохоор гал унтраах аврах ангийнхныг бүрдүүлж 13:31 цагт ажлаас гарч, 13:45 цагт ослын газар очсон. Ослын газар хоёр цаг 35 минут ажиллаж иргэд, автомашиныг гаргасан. Нэг завь, гурван техниктэй очиж аварсан. Онцгой байдлын албанд дуудлага ирвэл 20-30 минутын дотор өөрсдийгөө бэлдэж гардаг. Онцгой байдлын албан хаагч нар бүгд усанд сэлдэг гэж иргэд андуурдаг. Аврах ажиллагаа, гал унтраах зэрэг төрөл бүрийн мэргэжилтэй хүмүүс ажилладаг.

-Иргэдийн биеийн байдал ямар байна вэ?

    -Нөхөр нь 56 настай, эхнэр нь 36 настай, охин нь гурван настай байсан. Эмэгтэйг уснаас гаргахад гишгэж чадахгүй хямарчихсан байсан. Тэднийг дулаан машинд суулгаж эмнэлгийн анхан шатны тусламж үзүүлээд ар гэрийнхэнд нь хүлээлгэж өгсөн. Иргэд одоо гэртээ байгаа.

-Та Онцгой байдлын албанд хэдэн жил ажиллаж байгаа вэ. Өнгөрсөн жил хэчнээн дуудлагад явсан байна вэ?

    -Би Онцгой байдлын байгууллагад 27 жил ажиллаж байна.Өнгөрсөн жил 40 орчим дуудлагад явсан. Зам тээврийн осол, усны дуудлага, шуурганд төөрөх, цасанд суух, хүн, малын гоц халдварт өвчин зэрэг бүх төрлийн дуудлагад явдаг.

-27 жилийн турш бусдын эрүүл мэнд, амь, эд хөрөнгийн аюулгүй байдлыг хангаж, авран хамгаалсан байна. Иргэд баярласан сэтгэлээ илэрхийлж чаддаг уу?

    -Яг үнэндээ, иргэд аврах ажиллагаа дууссаны дараа баярласан сэтгэлээ илэрхийлж чаддаггүй. Өөрсдөө хямарчихсан байдаг учраас өөрийгөө ямар нэгэн байдлаар илэрхийлж чаддаггүй гэсэн үг. Гэвч бидний хувьд хүний амь аварна гэдэг бахархал юм шүү дээ. Хамгийн гол нь өөрсдөө болон бусдыг эрсдүүлээгүйдээ маш их баярладаг. Он гарснаас хойш гол, устай холбоотой хоёр дахь дуудлага ирж байна. 14 хоногийн өмнө хоёр хүүхдийг уснаас аварсан.  

-Дулаан орж байгаа цагт иргэдэд юу анхааруулж хэлэх вэ?

    -Урин дулаан цаг эхлэхээр иргэд агаар салхинд гарч, гол дээр очдог. Энэ үед иргэд баталгаатай зам, гарцаар гарахгүй өөрсдийгөө эрсдэлд оруулдаг. Мөн бага насны хүүхдийг хараа хяналтгүйгээр гол руу дагуулж явах хэрэггүй.