Халдварын бүсэд ажиллаж байсан сувилагч өндрөөс унаж, амиа алдсантай холбоотойгоор Эрүүл мэндийн сайд С.Энхболд эмгэнэл илэрхийллээ. Тэрбээр “Улсын нэгдүгээр төв эмнэлгийн улаан бүсэд ажиллаж байсан сувилагч өнгөрсөн шөнө амиа алдлаа. Сувилагчийн ар гэр, төрөл төрөгсөд, хамтран зүтгэгч, эрүүл мэндийн салбарын нийт албан хаагчдадаа гүн эмгэнэл илэрхийлье. Холбогдох хууль хяналтын байгууллага шалтгааныг тогтоох ажилд Эрүүл мэндийн яам, эмнэлгийн удирдлагууд түргэн шуурхай хамтран ажиллах болно. Эрүүл мэндийн салбарынхан чимээгүй л ажлаа хийж ирсэн ч элдэв янзаар сэтгэл санааны дарамтад өртүүлэх явдал гарч буй учир цаашид ийм үйлдлийг гаргахгүй байцгаая гэж олон нийтийг уриалж байна.

Коронавирусийн халдварын амаргүй хүнд нөхцөлд хариуцлагатай ажиллаж буй эмч, эмнэлгийн ажилтнуудаа хаана ч өмгөөлж хамгаална. Нэг эмч, нэг сувилагчийн нэр муугаар хэлэгдэхэд сэтгэл урагддаг. Эрүүл мэндийн сайдын хувьд салбарынхнаа өмөөрөх болно” гэжээ.