Засгийн газрын 2021 оны дөрөвдүгээр сарын 28-ны хуралдаанаар коронавируст цар тахлын нөхцөл байдал, хариу арга хэмжээний талаар Монгол Улсын Шадар сайд, Улсын онцгой комиссын дарга С.Амарсайхан, Эрүүл мэндийн сайд С.Энхболд нар танилцууллаа.

Өчигдөр 19:00 цагийн байдлаар улсын хэмжээнд 744.564 хүн (зорилтот бүлгийн 36 хувь) вакцины нэгдүгээр, 262.466 хүн хоёрдугаар тунд хамрагдсан байна. Нийслэлд 592.362 хүн нэгдүгээр тунд, 253.321 хүн хоёрдугаар тунд хамрагджээ. 

Засгийн газраас нийслэлийн насанд хүрсэн иргэд буюу зорилтот бүлгийг Гамшгаас хамгаалах бүх нийтийн бэлэн байдлын хугацаанд вакцины нэгдүгээр тунд бүрэн хамруулж дуусгах үүргийг Улсын болон Нийслэлийн онцгой комисст өгөв. Өөрөөр хэлбэл, өнөөдрөөс ирэх сарын 8-ныг дуустал нийслэлийн 18 ба түүнээс дээш насныхан буюу зорилтот бүлгийн 1.1 сая иргэнийг коронавирусийн эсрэг вакцины нэгдүгээр тунд бүрэн хамруулах юм. Нэгдүгээр тунгаас гадна хоёрдугаар тундаа хамрагдах иргэдийг мөн хуваарийн дагуу давхар дархлаажуулах аж.