Завхан аймгийн төв болон зургаан суманд коронавирусийн халдвар бүртгэгджээ. Тус аймгийн хэмжээнд 226 иргэн халдвар авснаас 47 нь эдгэрч, хоёр иргэн нас барсан байна. Халдвар авсан иргэдийн 10 нь  малчин гэх мэдээлэл бий. Тэгвэл сумын төвөөс зайдуу амьдардаг малчид ямар учраас халдвар авсан талаар тус аймгийн Засаг дарга Д.Түвшинжаргалаас тодрууллаа.

    Тэрбээр “Тосонцэнгэл, Их-Уул сумын 10 малчнаас коронавирусийн халдвар илэрсэн. Тосонцэнгэл суманд буяны ажилтай холбоотой гурван голомт байгаа. Малчид сумын төв орж худалдаа, үйлчилгээний газраар үйлчлүүлж, буяны ажилд оролцсоны улмаас халдвар авсан. Манай аймгийн Шилүүстэй суманд зургаа, Улиастайд 46, Тосонцэнгэлд 127, Их-Уул суманд 31, Завханмандалд 14, Нөмрөг сумын хоёр иргэнээс коронавирусийн халдвар илэрсэн. Мөн 11 хүүхэд тус өвчнөөр өвчилсөн. Үүнээс эдгэрсэн 47, эмчлүүлж буй 164 хүн байна. Одоогийн байдлаар биеийн байдал хүнд гурав, хүндэвтэр 60, хөнгөн 101 өвчтөн байгаа. Их-Уул суманд өчигдрийн байдлаар 27 ор дэлгэсэн. Харин Тосонцэнгэл сумын эмнэлгийн ор дүүрсэн учир өчигдөр хоёр спорт зааланд нийт 60 ор дэлгэлээ. Завхан аймгийн хэмжээнд 3426 иргэн гэрийн тусгаарлалтад, 43 иргэн тусгаарлах байранд байна” гэлээ.