Хөвсгөл аймгийн Тосонцэнгэл сумын Тээл багийн Тэгш булан гэдэг газарт Сэлэнгэ мөрнийг гаталж явсан 10 хүний долоо нь усанд живснийг өмнө мэдээлсэн. Аврах багийнхан болон нутгийн иргэд гурван бүлэгт хуваагдан эрэн хайж, таван хүний цогцсыг Сэлэнгэ мөрний эргээс олж, цагдаагийн байгууллагад шилжүүлжээ. Үзэгдэх орчин хязгаарлагдмал болсон тул эрэн хайх ажлыг өчигдрийн 21:00 цагт түр зогсоож, өглөө 6:00 цагт дахин эхлүүлсэн байна.

   Тус аймгийн Мөрөн, Төмөрбулаг, Рашаант сумын харьяат 10 хүн Тосонцэнгэл сумын Тээл багаас Рашаант сум руу явахаар Сэлэнгэ мөрнийг завиар гатлах үед татлага олс тасарч, завь нь хөмөрч, гурван хүн мэнд гарсан юм. Одоогоор осол болсон газраас 20-25 км-т Овоот, Ногоон арал гэдэг газарт усаар дөрвөн завь урсган, хоёр дрон нисгэн, мөн эрэг дагуу морьтой, явган 150 гаруй хүн хоёр хүний цогцсыг эрэн хайж байгааг ОБЕГ-аас мэдээллээ.