АШУҮИС-ийн Эмнэлзүйн молекул оношлогооны төв шүлсэнд SARS-CoV-2-ыг илрүүлэх шинжилгээний шинэ PCR оношлуурыг гуравдугаар сарын 25-нд улсын бүртгэлд бүртгүүлсэн аж. Харин Эрүүл мэндийн сайд С.Энхболдын тушаалаар өнөөдрөөс ХӨСҮТ, ЗӨСҮТ, НЭМҮТ, АШУҮИС,  СБДНЭ, болон УНТЭ, УХТЭ зэрэг лабораториудад 10 мянган оношлуурыг хуваарилах юм.

Эрүүл мэндийн яамны Төрийн нарийн бичгийн дарга Ц.Эрдэмбилэг “Монгол эрдэмтдийн бүтээсэн шүлснээс коронавирус илрүүлэх шинжилгээ нь цаг хугацааг хэмнэсэн шинжлэх ухаан болон эрүүл мэндийн салбарт үнэтэй хувь нэмэр оруулах сайн бүтээл болсон. Шүлснээс авах шинжилгээ нь хамар залгиурын арчдасаас авах шинжилгээнээс зовиур багатай, хямд өртөгтэй. Монгол Улсын засгийн газрын захиалгаар АШУҮИС-ийн Эрдэмтдийн бага энэхүү оношлуурыг хийж зах зээлд нэвтрүүлж байна. Нэг хайрцгаас 96 хүний шинжилгээг хийдэг. Шинжилгээний хариу 90 минутын дараа гардаг давуу талтай” гэлээ.