Коронавирусийн тархалтын талаарх ээлжит мэдээллийн үеэр ХӨСҮТ-ийн дэд захирал Ж.Байгалмаа мэдээлэл өглөө. Тэрбээр "Эмийн бус хариу арга хэмжээ буюу хатуу хөл хориог хэрэгжүүлж байна. Хатуу хөл хорионы дэглэм өвчлөлийн нөхцөл байдлаас шалтгаалан онцлогт тохируулан хэрэгжүүлдэг. Тухайлбал, эрүүл мэндийн байгууллагын нөхцөл байдал хүндэрсэн тохиолдолд хатуу хөл хориог авч хэрэгжүүлж байгаа. 

Манай улсад дотоодын анхны халдвар өнгөрсөн оны арваннэгдүгээр сарын 10-нд бүртгэгдсэн. Түүнээс хойш дөрвөн удаа хөл хорио тогтоогоод байна. Эхний хөл хориог нэг сар, дараагийнх нь 21, гурав дахь нь 10 хоногийн хугацаатай байсан. Өдгөө дөрөв дэх удаагийн хөл хорио хэрэгжиж байна. Анхны хөл хориог урт хугацаатай хэрэгжүүлсний үр дүнд өвчлөлийг тодорхой хэмжээгээр бууруулж чадсан. Харин гурав дахь хөл хорионы дараагаас халдварын тоо тасралтгүй нэмэгдэж байна. Халдварын тохиолдлыг хүн амын хөдөлгөөнтэй харьцуулж харвал, эхний хөл хориогоор хүмүүсийн хөдөлгөөн 40-60 хувиар буурсан. Харин одоогийн хөл хорионы үеэр хөдлөгөөн 15 хувиар буурсан байна. Энэ удаагийн хөл хорио энэ сарын 25-нд дуусах боловч үргэлжлүүлэн халдварын том давалгаа гарах тооцоо бий. Харин хөл хориог дахин долоо хоногоор сунгавал хөл хорионы дараа халдвар нэмэгдэх ч аажмаар буурах хандлагатай байна” гэлээ.