Өргөн нэвтрүүлгийн телевизийн холбооноос зохион байгуулж буй “Карантин 14” шоу нэвтрүүлгийн “Бид гэртээ” челленжийн ялагчаар Баянхонгор аймгийн тав дугаар багийн иргэн Ц.Батмөнх, С.Чимэдсүрэн нар шалгарч “IPhone 12 Promax” гар утсын эзэд болсон юм. Ийнхүү тэдэнтэй баярын сэтгэгдлийг нь хуваалцлаа.

-Сайн байна уу. Сайхан хаваржиж байна уу. Та хоёр хорионы үед юу хийж байна вэ?

-Сайн. Сайн байна уу. Хөл хорионы үед гэрийнхээ ажлыг хийгээд, телевиз үзээд сууж байна.  Бид хоёр гадуур огт явдаггүй. Бид 71, 72 настай улс. Манай аймагт коронавирусийн халдвартай 70 гаруй хүн бүртгэгдсэн гэсэн. Бид хоёр зээ охинтойгоо хамт байна. Тэд цахим хичээлээ үзэж байгаа юм.

-“Карантин 14” шоу нэвтрүүлгийн “Бид гэртээ” челленжийн ялагч болсон байна лээ. Яагаад челленжид нэгдэх болсон бэ. Ялагч болсон сэтгэгдлээ хуваалцахгүй юу?

-Бид хоёр “Карантин 14” шоу нэвтрүүлгийн хоёр дахь дугаарын  “Бид гэртээ” челленжийн ялагч болсондоо маш их баярлаж байгаа. Тус шоу нэвтрүүлгийг үзэж байтал Саруулбат гэх дасгалжуулагч багш хөтлөгчдөд болон үзэгчдэд дасгал зааж өгсөн юм. Тэр дасгалыг нь  бид хоёр дагаж хийсэн юм. Гэтэл зээ охин минь аав, ээж, ах, дүүдээ үзүүлэх гээд гар утсан дээрээ бичлэг хийчихсэн байсан. Харин нэвтрүүлгийн төгсгөлд  “Бид гэртээ” хэмээх челленж зарлаж байна. Та бүхэн идэвхтэй оролцоорой гэсэн юм. Тэгсэн манай хоёр охин хоорондоо ярилцаж байгаад бидний дасгал хийж байгаа бичлэгийг цахим хуудаст нийтэлсэн юм билээ.

-Та хоёрын бичлэгийг хэдэн хүн үзсэн байна бэ. Хүмүүс ямар сэтгэгдэл үлдээсэн байна вэ?

-Тус челленжийг 24 цагийн дараа шалгаруулах ёстой юм билээ. Тус хугацаанд 21 мянган лайк, 3800 шэйртэйгээр түрүүлсэн юм байна. Хүмүүс маш эерэг сайхан сэтгэгдэл үлдээсэн байна лээ. Дандаа урт, удаан наслаж, эрүүл, саруул байхыг хүсэн ерөөсөн байсан. Тэр хүмүүст дахин баярласан гэдгээ хэлмээр байна. Бидний шагнал болох гар утас ч хурдан ирсэн. Манай айигийн Онцгой комиссын хүмүүсээр өгч явуулсан байна лээ. Бид хоёр гар утас сайн ажиллуулж чадахгүй учраас бидний бичлэгийг хийж, цахим хуудаст нийтэлсэн оюутан охиндоо өгсөн. Гар утсаа зөв, зохистой зүйл ашиглаасай гэж хүсэж байгаа. Үнэхээр гоё гэхэд ч багадмаар гоё утас байсан шүү. Хүүхдүүд минь ч их баярласан даа.

-Ярилцсанд баярлалаа. Та хоёрт эрүүл энхийг хүсье.

-Баярлалаа