“Гацуурт” ХХК-ийн ерөнхий захирал Л.Чинбатыг эрэн сурвалжилж байна гэх мэдээлэл хэвлэл мэдээллийн хэрэгслээр гарсан. Тэгвэл уг мэдээлэлд Хөдөлмөрийн баатар Л.Чинбат “Намайг цагдаагаас эрэн сурвалжилж эхэллээ гэжээ. Хаврын тариалалтын бэлтгэл ажлаар Сэлэнгэ аймгийн Цагааннуур суманд ажиллаж байна аа. Эрүүгийн Цагдаагийн Газраас надад нэг ч удаа өөрт мэдэгдээгүй мөн манай өмгөөлөгчид 2021 оны дөрөвдүгээр сарын 26-ны өдөр намайг дуудан ирүүлэх бичиг өгчихөөд уг өдөр нь болоогүй байхад оргодол мэтээр улс орон даяар зарлаж, эрэн сурвалжилжээ. Урамшууллын мөнгө илүү авсан хэргээр тав дахь жилдээ шалгагдаж байна. “Гацуурт” ХХК-ийг үүсгэн байгуулж, сүүлийн 20 гаруй жил газар тариалангийн салбарт үйл ажиллагаа явуулахдаа хавар, зун, намартаа өглөө 05:00 цагаас шөнийн 00:00 цаг хүртэл тариан талбай дээр ажиллаж өнждөг. Энэ хугацаанд ялангуяа цар тахалтай энэ хүнд цаг үед монголчууддаа эх орныхоор хөрсөнд тарьж, ургуулсан эрүүл хүнсийг хямд үнээр хүргэх зорилготой ажилласаар ирсэн. Улсаас нэг ч төгрөг хууль бусаар авч, хулгай хийж үзээгүй гэдгээ хариуцлагатайгаар хэлье. Тариалан Эрхлэлтийг Дэмжих Сантай дөрвөн удаа урамшууллын мөнгөний асуудлаар тооцоо нийлээд өглөг, авлагагүй болохоо баталгаажуулсан актууд, урамшууллын мөнгөтэй холбоотой санхүүгийн баримтуудыг үзээд та бүхэн дор бүрнээ дүгнэлтээ хийнэ биз ээ. Хууль хяналтын байгууллагын дарамт шахалтад манай улсад шударгаар хөдөлмөрлөж, ажиллаж амьдрахад үнэхээр хэцүү болжээ. Одоо бол маш их туйлдаж байна” гэсэн хариуг нүүр хуудсаараа илэрхийлээд байгаа юм. 

     Харин түүнийг эрэн сурвалжилж байгаа тухай мэдээллийг Цагдаагийн ерөнхий газрын цахим хуудаст өнөөдөр нийтэлсэн юм. Тодруулбал, “Цагдаагийн байгууллагаас түүнийг эрэн сурвалжлах болсон үндэслэлээ мөрдөн шалгах ажиллагааны явцад оршин суугаа газраа өөрчилсөн талаараа мэдэгдээгүй, холбоо барих утасны дугаар руу залгахаар дуудлагад хариу өгөхгүй эрүүгийн хэрэг хянан шийдвэрлэх ажиллагаанд саад учруулахгүй байх үүргээ биелүүлэхгүй таслан сэргийлэх арга хэмжээг зөрчсөн тул эрэн сурвалжилж байна” гэсэн байгаа билээ. 

    Л.Чинбат дээрх мэдээллийн хамт өнгөрсөн хугацаанд ТЭДС-гаас авсан зээл, зээлээ буцаан төлсөн баримт тэргүүтэй 32 хуудас бүхий баримтыг дэлгэжээ. Хамгийн гол нь түүнийг цагдаагийн байгууллагаас энэ сарын 26 буюу ирэх долоо хоногийн даваа гарагт ирэх зарлан дуудах хуудас өгсөн атлаа хуулийн байгууллагад очих хугацаа нь болоогүй байхад эрэн сурвалжилж эхэлсэн нь олон нийтийн анхаарлыг татаж байгаа юм. Үүнийг зарим эх сурвалж "Цагдаагийн байгууллага нэр бүхий хүмүүсийг ээлж дараалан санаатай болон санамсаргүйгээр албан ёсны хуудсаараа "Эрэн сурвалжилж байна" хэмээн зарлаж байгаа нь нэг намын нөлөөнд хэт автаж, тэдний гар хөл болсныг илэрхийлж байна" гэж байлаа. Өнгөрсөн сард дуучин Д.Болдыг мөн гэртээ байхад нь ЦЕГ-аас "Эрэн сурвалжилж байна" хэмээн албан ёсны хуудсаараа зарласан удаатай. 

Улсаас нэг ч төгрөг хууль бусаар авч, хулгай хийж үзээгүй гэдгээ хариуцлагатайгаар хэлье.