Шадар сайд С.Амарсайхан Сүхбаатар дүүргийн нэгдсэн эмнэлэгт ажиллаж байна. Тэрбээр “Дөрөвдүгээр сарын 25-наас коронавирусийн халдвараас урьдчилан сэргийлэх дархлаажуулалтыг эрчимжүүлнэ. Нийслэлийн насанд хүрсэн иргэдийг тавдугаар сарын 1-нээс  эхний тунд хамруулахаар ажиллаж байна.

Сүхбаатар дүүргийн хэмжээнд байгаа спорт, урлагийн төвүүдийг суурин цэг байдлаар бэлтгэх ёстой. Ингэхдээ иргэдийн орох, гарах гарц тусдаа байх, ажиглалтын хугацаанд иргэд хоорондын зайг сайтар барих нөхцөл бүрдүүлэх зүйтэй. Цар тахлын үед ачаалал нэмэгдэж, хүн хүч дутагдалтай байна. Эрүүл мэндийн салбарын ажилчид өдөр, шөнөгүй ажиллаж байгаа. Урт хугацаанд ингэж ажиллахад хүндрэлтэй. Тиймээс Засгийн газраас эмч, ажилчид, өрхийн эмч, резидент нарт илүү цагийн зардал, цалин урамшуулал, утас, унааны зардлыг онцгой үед нэмж олгох шийдвэр гаргахаар судалгаа, тооцоо хийж байна. Мөн цар тахлын онцгой нөхцөлд ажиллаж байгаа хүмүүсийн асуудлыг цаг алдалгүй шийдвэрлэхээр ажиллаж байна” гэлээ.