Цаг агаарын таагүй нөхцөл байдлаас үүдэн хөдөө, орон нутгийн иргэд төөрсөн, сураггүй болсон гэх дуудлагыг Онцгой байдлын ерөнхий газар ирүүлжээ. Дуудлагын дагуу онцгой байдлын албаныхан долоон иргэнийг эсэн мэнд олж, ар гэрийнхэнд нь хүлээлгэн өгсөн байна. Тэдний хоёр нь хүүхэд, хөгжлийн бэрхшээлтэй хоёр иргэн байсан аж. Түүнчлэн Дундговь, Өвөрхангай аймагт дуудлагын дагуу хоёр иргэнийг эрэн хайх ажиллагаа үргэлжилж байгаа аж.

Өвөрхангай аймгийн Сант сумын Цахиурт багийн Цайдам гэдэг газраас өчигдөр 17:30 цагийн үед бага насны хүүхэд гэрээсээ явган гараад сураггүй болсон тухай дуудлагыг өдрийн 18:25 цагт хүлээн авсан байна. Тус аймгийн Онцгой байдлын газрын Гал түймэр унтраах, аврах 12 дугаар ангийн алба хаагчид, сумын Засаг даргын Тамгын газрын ажилтнууд С гэх зургаан настай, эрэгтэйг  эрэн хайх ажиллагааг зохион байгуулж, мөн өдрийн 19:40 цагт гэрээс нь урд зүгт 5 км-т Цайдамын урд-Ар гэдэг газраас эсэн мэнд олж, ар гэрийнхэнд нь хүлээлгэн өгсөн байна.

Өвөрхангай аймгийн Хайрхандулаан сумын Дэрсэн хонхор багийн Өнөтийн-Өвөр хондлойн буудал гэдэг газар  өчигдөр 17:30 цагийн орчим малчин Э нь малдаа явган гараад сураггүй болсон тухай мэдээллийг өдрийн 19:00 цагт хүлээн авчээ. Тус сумын Засаг даргын Тамгын газрын ажилтнууд малчин Э гэх 48 настай, эмэгтэйг эрэн хайх ажиллагааг зохион байгуулж, мөн өдрийн 19:40 цагт малчин Б-ийнхаас гэрээс нь баруун урд зүгт 5 км-т эсэн мэнд олж, ар гэрийнхэнд нь хүлээлгэн өгсөн тухай мэдээллийг иргэн Б аймгийн Онцгой байдлын газарт мэдээлсэн байна.

Дундговь аймгийн Сайхан-Овоо сумын Мааньт багийн Бүүрцэгийн-Энгэр гэдэг газар 17:00 цагийн орчим малчин У гэрээсээ явган гараад сураггүй болсон тухай мэдээллийг өчигдөр 19:10 цагт хүлээн авчээ. Тус сумын Засаг даргын Тамгын газрын ажилтнууд малчин У гэх хөгжлийн бэрхшээлтэй, 36 настай, эрэгтэйг мөн өдрийн 20:02 цагт  Бага тойром гэдэг газраас эсэн мэнд олж, ар гэрийнхэнд нь хүлээлгэн өгсөн өгсөн тухай мэдээллийг сумын Засаг даргын Тамгын газрын дарга аймгийн Онцгой байдлын газарт мэдээлсэн байна.

Дундговь аймгийн Дэлгэрхангай сумын Номгон багийн Зүүн даравгай гэдэг газраас өчигдөр 19:00 цагийн орчим малчин Ц малдаа явган яваад сураггүй болсон тухай мэдээллийг өдрийн 20:39 цагт хүлээн авсан байна. Тус сумын Засаг даргын Тамгын газрын ажилтнууд малчин Ц гэх 58 настай, эрэгтэйг эрэн хайх ажиллагааг зохион байгуулж,  өнөө өглөө 05:30 цагт Ямаагийн худаг гэдэг газраас эсэн мэнд олж, ар гэрийнхэнд нь хүлээлгэн өгсөн тухай мэдээллийг сумын Цагдаагийн хэсгийн төлөөлөгч Онцгой байдлын газарт мэдээлсэн аж.

Дундговь аймгийн Эрдэнэдалай сумын Сангийн далай багийн Бурхантын бууц гэдэг газар өчигдөр 17:00 цагийн орчим малчин Ч, Н нар автомашинтай малдаа яваад сураггүй болсон тухай дуудлагыг шөнийн 01:16 цагт хүлээн авсан байна. Тус аймгийн Онцгой байдлын газрын Эрдэнэдалай сум дахь Эрэн хайх, аврах салбарын алба хаагчид малчин Ч гэх  55 настай, хөгжлийн бэрхшээлтэй  эмэгтэй, Н гэх 12 настай, эрэгтэй нарыг эрэн хайх ажиллагааг зохион байгуулж, шөнийн 02:19 цагт Батбуянгийн бууц гэдэг газраас эсэн мэнд олж, ар гэрийнхэнд нь хүлээлгэн өгсөн байна.

ИРГЭДИЙГ ЭРЭН ХАЙХ АЖИЛЛАГАА ҮРГЭЛЖИЛЖ БАЙНА

Дундговь аймгийн Баянжаргалан сумын Говьсүмбэр аймгийн Шивээ-Овоо сумаас тус аймгийн Сайнцагаан сумын чиглэлд иргэн Т мотоциклтой өчигдөр 18:00 цагийн үед Дундговь аймгийн Баянжаргалан сум өнгөрөөд явж байна гэж ар гэрийнхэнтэйгээ ярьснаас хойш сураггүй болсон тухай дуудлагыг Онцгой байдлын ерөнхий газар 21:40 цагт хүлээн авсан байна. Тус сумын Засаг даргын Тамгын газрын ажилтнууд, Гурвансайхан сумын Засаг даргын Тамгын газрын ажилтнууд иргэн Т, 42 настай, эрэгтэйг эрэн хайх ажиллагааг зохион байгуулж байна. Тус аймгийн Онцгой байдлын газрын алба хаагчид өнөөдөр 07:00 цагт хөдөлгөөн үйлдсэн байна.

Өвөрхангай аймгийн Сант сумын Улаан-Овоо багийн Сэкүл гэдэг газраас 17:00 цагийн орчим малчин С малдаа явган яваад сураггүй болсон тухай дуудлагыг шөнийг 02:05 цагт Онцгой байдлын ерөнхий газар  хүлээн авсан байна. Тус аймгийн Онцгой байдлын газрын Эрэн хайх, аврах салбарын алба хаагчид сумын Засаг даргын Тамгын газрын ажилтнууд малчин С гэх 43 настай, эмэгтэйг эрэн хайх ажиллагааг зохион байгуулж байна.

Эх сурвалж: ОБЕГ