Зарим иргэд, ААН-ийн хайхрамжгүй байдлаас шалтгаалан он гарсаар нийт 46 удаа цахилгаан шугам тоноглолыг гэмтээж, хэрэглэгчдийн цахилгаан хангамжийг тасалдуулсан байна.  Иргэд, аж ахуйн нэгжүүдийн болгоомжгүй үйлдлээс шалтгаалан цахилгаан эрчим хүчний тасралт, саатал их гардаг талаар өнгөрсөн хугацаанд багагүй мэдээлсэн. Гэвч иргэд, аж ахуйн нэгж, ажил гүйцэтгэгч нарын хайхрамжгүй, хэнэггүй үйлдлүүдээс болж цахилгаан хэрэглэгчдийг хохироосоор байна. Он гарснаар Улаанбаатар цахилгаан түгээх сүлжээ компанийн эзэмшлийн шугам, тоноглолыг гадны нөлөөтэй 46 удаа гэмтээгээд байна. Үүний улмаас хэрэглэгчдийн цахилгаан эрчим хүчний хэрэглээг тасалдуулсанаас 26 мянган киловатт цаг цахилгаан дутуу түгээгдсэн. Гадны нөлөөтэй гэмтлийн шалтгаан, нөхцөлийг авч үзвэл ихэвчлэн газар шорооны ажлыг дур мэдэн хийж, газар доорх цахилгаан дамжуулах кабель шугамыг гэмтээсэн, экскаватор, крантай автомашин механизмаар агаарын шугамын утас гогдож тасалсан, тулгуур болон дэд станцуудыг автомашинаар мөргөж гэмтээснээс үүдэлтэй байна.

Газар шорооны ажил зөвшөөрөлгүй хийх нь цахилгаан эрчим хүчний болон бусад инженерийн байгууламжийг гэмтээж, хэрэглэгчдийг хохироодгоос гадна ажил гүйцэтгэж байгаа хүний эрүүл мэнд, амь нас эрсдэх хүртэл онцгой аюултай байдаг.

Иймд газар шорооны ажлыг эхлүүлэхээс өмнө тухайн газар доор цахилгаан дамжуулах кабель шугам байгаа эсэхийг заавал тодруулах, хэрэв кабель шугамын ойр орчимд ажил гүйцэтгэхээр бол мэргэжлийн хүнийг байлцуулж, хяналт тавиулах зэрэг мэргэжлийн туслалцааг УБЦТС ТӨХК-ийн тухайн дүүрэг хариуцсан Түгээх төвд хандаж авахыг анхааруулж байна.