Хатуу хөл хорионы үед Эрүүл мэндийн салбарын ажилчид хувийн унаагаар зорчих боломжтой болсон талаар Эрүүл мэндийн сайд С.Энхболд өөрийн албан ёсны цахим хуудсаараа мэдэгджээ.

Тэрбээр "УОК-ын шуурхай хуралд эмч, ажилчдад тулгарч буй бэрхшээлийг танилцуулж шийдвэр гаргууллаа. Өнөөдрөөс Эрүүл мэндийн салбарын ажилчид замын хөдөлгөөнд хувийн унаагаар дугаарын хязгаарлалтгүй оролцож болно" хэмээжээ. Үйл ажиллагаа нь хязгаарлагдаагүй 15 салбарын ажилтнуудыг хувийн авто машинаар зорчуулахдаа Нийслэлийн засаг даргын гаргасан захирамжийн дагуу тээврийн хэрэгслийн улсын дугаарын сүүлийн орныг тэгш, сондгойгоор нь хязгаарлан хөдөлгөөнд оролцуулж байгаа юм. Ингэхдээ тухайн байгууллагын нийт ажилтны 10 хүртэл хувьд хувийг авто машинаар зорчихыг зөвшөөрсөн. Гэвч эрүүл мэндийн салбарын эмч, ажилтнууд хувийн унаагаар биш автобусаар зорчих нь бөөгнөрөл үүсгэж, нийт хүн амын дунд халдвар тархах эрсдэлийг нэмэгдүүлж байна гэх шүүмжлэлүүд гарч байсан юм.