ШШГЕГ-ын харьяа хорих анги, баривчлах байр болон түр саатуулах байруудад коронавирусийн халдвар гарсан. Одоогийн байдлаар хэчнээн хүн халдвар авч, эдгэрсэн талаар ШШГЕГ-ын ХМОНХТөвийн дарга, хошууч Х.Баясгалангаас тодрууллаа.

-ШШГЕГ-ын харьяа хорих анги, баривчлах байр болон түр саатуулах байруудад коронавирусийн халдвар гарсан. Одоогоор халдвар авсан хэдэн хүн байна вэ?

-Шүүхийн шийдвэр гүйцэтгэх ерөнхий газрын харьяа баривчлах байр, 409 дүгээр хорих ангийн хүлээлгийн хэсэгт шинээр хорих ял шийтгэгдэн ирсэн болон баривчлах шийтгэл хүлээсэн этгээдээс түргэвчилсэн оношлуураар шинжилгээ авч сөрөг хариуг үндэслэн хорих байранд хүлээн авдаг. Эхний шинжилгээгээр халдвар илрээгүй боловч шинж тэмдэг хожуу илэрч, давтан шинжилгээгээр хоригдсон этгээд, түүний өмгөөлөгчөөс коронавирусийн халдвар илэрч, 161 хүн халдвар авсан.

-Халдвар авсан газруудад болон халдвар авсан хоригдогчдод ямар арга хэмжээ авч байгаа вэ?

-Мэргэжлийн байгууллагын дүгнэлт, Хууль зүй, дотоод хэргийн яамны Гамшгаас хамгаалах мэргэжлийн анги, Шүүхийн шийдвэр гүйцэтгэх ерөнхий газрын саналыг үндэслэн Баянзүрх дүүргийн Засаг даргын 2021 оны А/131 дүгээр захирамжаар дөрөвдүгээр сарын 1-ний өдрөөс 14 хоногийн хугацаанд Баривчлах байранд голомтын бүс тогтоож, үйл ажиллагааг түр зогсоосон.  Дээрх хугацаанд халдвар хамгаалал, ариутгал халдваргүйжүүлэлт хийх ажлыг мэргэжлийн байгууллагуудтай хамтран зохион байгуулж, халдварын голомтод ажилласан алба хаагчдыг тусгаарласан. Шүүхийн шийдвэр гүйцэтгэх байгууллагын хэмжээнд коронавирусийн халдвараас урьдчилан сэргийлэх, халдвар илэрсэн үед хэрэгжүүлэх хариу арга хэмжээний төлөвлөгөө, Халдварт өвчин судлалын үндэсний төвөөс өгсөн заавар, зөвлөмжийн дагуу халдварын ойрын болон дам хавьтал, халдвар авсан этгээдийг нэн даруй эрэмбэлэн тусгаарлаж, зохих стандартын дагуу хүн бүрд өвчний түүх нээн эмчилгээг хийснээр халдвар авсан 126 баривчлагдсан этгээд бүрэн эдгэрсэн.

-Халдвар гарснаас хойш хоригдогчдын тоо цөөрсөн үү, өдөрт дунджаар хичнээн иргэн хоригдож байна бэ?

-Улсын хэмжээнд үйлдэгдэж буй гэмт хэрэг, зөрчлийн нөхцөл байдлаас шалтгаалан хоригдох этгээдийн тоо цөөрөөгүй. Гэмт хэрэгтэй тэмцэх, олон нийтийн аюулгүй байдлыг хангах чиг үүрэг бүхий цагдаа, шүүх, прокурорын байгууллагын үйл ажиллагааг хязгаарлах боломжгүй юм.     Өдөр тутам үйлдэгдэж буй гэмт, хэрэг зөрчлийн нөхцөл байдлаас шалтгаалан хорих байруудад дунджаар 60-80 хоригдогчийг шинээр хүлээн авдаг.