Улсын начин Э.Энхбатыг  өнөөдөр БНСУ руу авч явсан талаар бид өмнө нь мэдээлсэн. Тэрбээр Гэмтэл согог судлалын үндэсний төвийн Сэхээн амьдруулах тасагт  ес хоног хэвтэн эмчлүүлсэн ч бие нь  сайжрахгүй бүтэн унтуулгатай байсан юм. Түүнийг дагаж хоёр эмч, нэг сувилагч БНСУ руу явсан. Түүний эмчилгээнд зориулсан хандивын аяныг бөхчүүд эхлүүлсэн байна. Түүнчлэн Монгол Улсын Ерөнхийлөгч Х.Баттулга мөнгөн тусламж үзүүлсэн байна.

Одоогоор эмчилгээнд  хэдэн төгрөг шаардлагатай нь тодорхой бус байгаа аж. Н.Түвшинбаярын ар гэрийн зүгээс эмчилгээний зардлуудыг гаргаж байгаа гэсэн мэдээллийг Н.Түвшинбаяр аваргын өмгөөлөгч Л.Данзанноров хэвлэлд ярьсан аж. Улсын начин Э.Энхбатыг зодож, хүнд гэмтэл учруулсан  Монгол Улсын Хөдөлмөрийн баатар, МҮОХ-ын ерөнхийлөгч Н.Түвшинбаярыг 20 хоног цагдан хорих шийдвэрийг Хан-Уул дүүргийн Эрүүгийн хэргийн анхан шатны шүүхээс гаргасан юм.