Шүүхийн шийдвэр гүйцэтгэх ерөнхий газрын хяналтад байсан зорих эрхийг хязгаарлах ялаар шийтгүүлсэн этгээд тоног, төхөөрөмж эвдсэн гэх мэдээлэл гарсан. Энэ талаар ШШГЕГ-ын ХМОНХТөвийн дарга, хошууч Х.Баясгалангаас тодрууллаа.

-Эрүүгийн хуульд заасан зорчих эрхийг хязгаарлах ял энэ оны эхээр хэрэгжиж эхэлсэн. Одоогийн байдлаар хэдэн хүн тус ялыг эдэлж байна вэ?

-Өнөөдрийн байдлаар зорчих эрхийг хязгаарлах ялаар нийт 15 хүн шийтгүүлж байна. Эдгээр хүнд нэг сараас хоёр жилийн хугацаатайгаар зорчих эрхийг хязгаарлах ял ногдуулсан байна.

-Энэ хугацаанд тоног төхөөрөмж эвдэрч, гэмтсэн тохиолдол байгаа юу?

-Тоног төхөөрөмжийг эвдэж, гэмтээсэн тохиолдолд хуулийн хариуцлага хүлээлгэхээр заасан байдаг. Энэ хугацаанд тоног төхөөрөмжийг эвдэж, гэмтээсэн тохиолдол гараагүй байна.

-Хэрэв эвдэрч, гэмтсэн бол ямар арга хэмжээ авах вэ?

-Хувийн өмчит хуулийн этгээдийн техник хэрэгсэл, тоног төхөөрөмжийг ашиглахтай холбогдон гарах зардлыг тооцох, санхүүжүүлэх, нөхөн төлүүлэх, төлбөрөөс чөлөөлөх журмын 2.3, 2.4, 2.5 дугаар зүйлд заасны дагуу шийдвэр гүйцэтгэгч тоног төхөөрөмжийг худалдан авсан анхны өртөгийн мөнгөн дүнгээр төлүүлнэ гэж байдаг. Тоног төхөөрөмжийг эвдэж, гэмтээсэн тохиолдолд энэ журмын зохицуулалтаараа харицлага хүлээлгэнэ.