Өнгөрсөн амралтын өдрүүдэд Тээврийн цагдаагийн албаны Жижүүрийн шуурхай удирдлагын хэлтэс 671 дуудлага мэдээлэл хүлээн авсан байна. Үүнээс  зам тээврийн ослын шинжтэй 465 дуудлага мэдээлэл бүртгэгдсэн аж. Бүртгэгдсэн зам тээврийн ослын улмаас 10 хүн гэмтэж, ноцтой зам тээврийн ослын улмаас орон нутаг хоёр, нийслэлд нэг хүний амь хохирчээ.

Тухайлбал, Дундовь аймгийн Өндөршил сумын Эргэн шанд гэх газарт сумын төвөөс 40 км, шороон замд Даун маркийн улсын дугааргүй мотоцикл онхолдож, жолоочийн амь хохирсон. Мөн Завхан аймгийн Идэр сумын Загастай баг Улаан үзүүр гэх газар сумын төвөөс 13 км, асфальтан замд хувийн эзэмшлийн "Hyundai-Porter "  маркийн автомашин онхолдож, зорчигч амиа алджээ.  Баянзүрх дүүргийн 21 дүгээр хорооны нутаг дэвсгэр, Дарь-Эх, Жамсран уулын хойд замд Д жолоочтой "Hyundai-Porter" маркийн автомашин, явган зорчигчийг мөргөж, амийг нь хохироосон байна.

Жолооч та бүхэн согтууруулах ундааны зүйл хэрэглэсэн үедээ тээврийн хэрэгсэл жолоодохгүй байх, замын хөдөлгөөнд оролцохдоо хурд хэтрүүлэхгүй байх, явган зорчигч та бүхэн гарц, гарамтай хэсгээр зам гарах, мотоциклтой замын хөдөлгөөнд оролцохдоо хамгаалах малгай өмсөж оролцохыг цагдаагийн байгууллагаас анхааруулж байна.