Говь-Алтай аймгийн Алтай сумын Хилийн цэргийн 0214 дүгээр ангийн Баянтоорой заставын хугацаат цэргийн алба хаагчид өнгөрсөн шөнө 22:00 цагийн үед харуулын даргаа хөнөөгөөд зугтсан хэрэг гарсан. Уг хэргийн талаар Хил хамгаалах ерөнхий газрын дэд дарга Ш.Лхачинжав мэдээлэл өглөө. Тэрбээр “Хилийн цэргийн Говь-Алтай аймгийн Алтай сумын 0214 дүгээр ангийн дөрөвдүгээр заставын харуул дээр өчигдөр 22:00 цагт хилийн манаанд үүрэг гүйцэтгээд ирсэн байлдагч Х, М нарын бууг харуулын дарга шалган хураах үед өөдөөс нь зэвсэг хэрэглэж, амийг нь хөнөөж, харуулын байрыг орхин зугтсан. Энэ хэрэгтэй холбоотойгоор Говь-Алтай аймгийн цагдаагийн болон тагнуулын байгууллага, 0214 дүгээр ангийн захирагчтай өнгөрсөн шөнө ажиллалаа. Одоогийн байдлаар хэрэг үйлдсэн хоёр байлдагчийг мөрдөн шалгаж байна. Алтай сумаас 50 орчим километр газарт унаж явсан мотоциклоо орхин цааш явсан мөрийг илрүүлээд байна.

Харуул дээр энэ хэргийн талаар хэл дуулгасан хоёр алба хаагч үлдсэн. Энэ дөрвөн байлдагч 2020 оны аравдугаар сард хилийн цэрэгт татагдаж ирсэн. Харуулын дарга байлдагчдад ямар нэгэн дарамт үзүүлдэг байсан эсэх талаар асуухад "Тийм зүйл байгаагүй. Харин ч цэргүүдтэй эвтэй харьцдаг, шүлэг уншиж өгдөг, яруу найргийн талаар бидэнтэй ярилцдаг байсан" гэх мэдээллийг харуул дээр үлдсэн хоёр алба хаагч хэлсэн. Хууль хяналтын байгууллага уг хэргийн шалтгаан нөхцлийг тогтоохоор ажиллаж байна.

Хэрэг үйлдсэн хоёр цэргийн нэг нь Ховд аймгийн Чандмань сумын харъяат Х, нөгөө нь Орхон аймгийн Баян-Өндөр сумын харъяат М гэдэг байлдагч. Цэргүүдийн сэтгэл зүйн хувьд ямар нэгэн анхаарал татахаар шинж тэмдэг илрээгүй. Иймд яагаад, юунаас болоод ийм хэрэг үйлдвэх болов гэдэгт дүгнэлт хийж байна. Оргосон хоёр цэргийн ар гэрийнхэнтэй холбогдож, хэргийн талаар хэлсэн. Аав ээж нь “Хилийн цэргийн ангид хүүгээ сайн байгаа гэж бодож байсан. Ийм зүйл сонсоод сандарч байна. Одоо яах вэ” гэж хэлж байгаа.

Хилийн манаанд үүрэг гүйцэтгэж ирээд хилээс 15 орчим километр зайд байрлах Алтай сумын малчин М гэдэг айлын мотоциклыг авч, явахдаа боорцог, идэж уух юм аваад гарсан байна. Ингэж яваад 50 орчим км зайд мотоциклынх нь бензин дууссан учир цааш уул руу орсон нь тогтоогдсон. Явсан зүг чигийн хувьд өөрсдийн нутаг руу Бугат сум чигтэй байна.

Амиа алдсан харуулын дарга “Эх орны манаа” сонины түүхт 80 жилийн ойгоор зохион байгуулсан шүлгийн уралдаанд дэд байр эзэлсэн, хамгийн сайн, шилдэг харуулын дарга байсан. Эхнэр гурван хүүхдийн хамт амьдардаг. Эхнэр нь хилийн заставд хамт амьдарч цэргүүдэд хоол хийж өгдөг байсан. Хэрэг үйлдсэн хоёр цэргийн нэг болох Ховд аймгийн Чандмань сумын харъяат Х нь ам бүл дөрөв, аав ээж дүүгийн хамт амьдардаг. Нөгөө цэрэг нь ам бүл тав, эгч дүү аав ээжийн хамт амьдардаг 19 настай залуучууд. Өргөсөн тангаргаасаа буцаж, ийм зүйл хийсэнд харамсаж байна.

Хил хамгаалах байгууллага хуулийн дагуу  зэвсэг хэрэглэдэг ганц байгууллага. Нэг цэрэг 25 сумтай зэвсгийг биедээ авч явдаг. Оргосон хоёр цэрэг нийт 45 сумтай зэвсэг авч явааг тогтоосон” гэж хэллээ.

Хэрэг үйлдэгчид харуулын даргаа буудаж хороогоод, АКМ галт зэвсэг хоёр, 45 сум авч, айлын гаднаас  улсын дугааргүй “Хурд” загварын мотоциклыг нь дээрэмдэн унаж, явсан байна. Тухайн застав дээр харуулын дарга нь дөрвөн байлдагчийн хамт байсан аж. Хэрэг гарсны дараа нөгөө хоёр байлдагч нь 25 км-ийн зайтай застав руугаа ирж, хэл дуулгажээ. Тус хэргийг Говь-Алтай аймгийн цагдаагийн байгууллагаас шалгаж байгаа бөгөөд цэргүүдийг эрэн сурвалжилж байна.