Засгийн газраас энэ сарын 10 буюу ирэх бямба гарагаас эхлэн бүх нийтийн бэлэн байдлын зэрэгт шилжиж, 15 хоногийн хугацаатай хөл хорионы хатуу дэглэм тогтоох шийдвэр гаргасан. Түүнчлэн иргэдэд дэмжлэг болгох үүднээс 300 мянган төгрөгийг 7-10 хоногт багтаан олгохоор болсон билээ. Энэ шийдвэртэй холбоотойгоор ШӨХТГ-аас томоохон хүнсний зах, аж ахуйн нэгж байгууллагуудыг үнийн хөөрөгдөл үүсгэх, зохиомол хомсдол бий болгохоос сэргийлж, хяналт тавих зорилгоор ажлын хэсэг байгуулжээ.  

Энэ талаар ШӨХТГ-ын дарга Б.Бат-Эрдэнэ “Өнгөрсөн 2020 оны арваннэгдүгээр 11-нд бүх нийтийн бэлэн байдлын зэрэгт шилжих үед УОК-оос үнийн хөөрөгдөл үүсгэхгүй байх тал дээр хяналт тавих тухай 20 дугаар тушаал гаргасан. Засгийн газрын өнөөдрийн хуралдааны шийдвэртэй холбоотойгоор УОК-оос ямар нэгэн тушаал, тогтоол ирүүлээгүй байна. Гэвч хөл хорио тогтоосон хугацаанд дээрх тушаалын дагуу хяналт тавьж ажиллана. Энэ хүрээнд ажлын хэсэг гаргаж, хүнсний зах, худалдааны төвүүдэд хяналт шалгалт хийнэ. Үнийн хөөрөгдөл үүсгэсэн аж ахуйн нэгж, байгууллагыг 20 сая, иргэнийг хоёр сая төгрөгөөр торгоно” гэлээ.

Д.ЦЭДЭВСҮРЭН