Шүүхийн шийдвэр гүйцэтгэх ерөнхий газрын харьяа 409 дүгээр хаалттай хорих ангид халдвар голомтлон тархсан гэх мэдээлэл байгаа билээ.

Тэгвэл ШШГЕГ харьяа 409 дүгээр хаалттай хорих ангийн дарга С.Батсайханаас энэ талаар тодруулахад “Халдвар илэрсэн зарим хүнийг Цагдан хорин 461 дүгээр анги руу шилжүүлсэн байгаа. Халдвар илэрсэн хүний тоо 100 давсан гэдэг нь худал мэдээлэл байна. Манай ангийн үйл ажиллагаа хэвийн явагдаж байна. Дэлгэрэнгүй мэдээллийг манай газрын Олон нийттэй харилцах хэлтсээс тодруулаарай” гэв.

ШШГЕГ: Шүүхээс шинээр хорих ялаар шийтгүүлэн, 409 дүгээр хаалттай хорих ангийн түр тусгаарлах байранд ирсэн  хоригдогчоос халдвар илэрсэн

Харин энэ талаар ШШГЕГ-ын Хэвлэл мэдээлэл, олон нийттэй харилцах төвийн даргаас тодруулахад “Шүүхээс шинээр хорих ял шийтгүүлэн 409 дүгээр хаалттай хорих ангийн түр тусгаарлах байранд ирсэн хоригдогч, түүний өмгөөлөгчөөс эх үүсвэртэй халдвар илэрсэн. Нийт 70 хүнээс халдвар илрээд байна. Халдвар илэрсэн хоригдогч нараас биеийн байдал хүндэрсэн, шинж тэмдэг илэрсэн зүйл байхгүй. Шаардлагатай хүмүүсийг Цагдан хорих 461 дүгээр ангийн эмнэлэгт шилжүүлэн эмчилгээнд хамруулж байна. Нийт хоригдогч нараас шинжилгээ авсан бөгөөд өнөөдрөөс вакцинд хамруулах ажлыг эхлүүлээд байна” гэлээ.