Өнгөрсөн долоо хоногийн ажлын сүүлийн өдөр Ерөнхий сайд Л.Оюун-Эрдэнэ нийтийн тээврийн салбарын ажилтай танилцлаа. Гэвч тэрбээр газар нь хууль бусаар зарагдсан гэх хэл ам дагуулаад байгаа Автобус гуравдугаар баазаар очсонгүй. Мэдээж, тухайн газрын ажилчдын эсэргүүцэлээс Ерөнхий сайд зугтсан байх.

Тус байгууллагын газрыг  өнгөрсөн оны зургаадугаар сард УИХ-ын гишүүн Ж.Ганбаатарын хамаарал бүхий компани 20.2 тэрбум төгрөгөөр дуудлага худалдаагаар авсан гэдэг. Газар нь зарагдаад тухайн байгууллагын ажилчид автобустайгаа байрнаасаа хөөгдөж очих газаргүй болчихоод байгаа. Газрыг нь авсан компани гражнаас нь эхлээд буулгаад эхэлчихсэн нөхцөл байдлаас Ерөнхий сайд зугтах аргагүй биз.

Дуудлага худалдаа шударга явагдсан уу гэдэг нь олон эргэлзээ төрүүлдэг. Яг сонгуулийн үетэй давхацсан. Тухайн үеийн Хотын дарга С.Амарсайхан байсан ч УИХ-д нэр дэвшиж байсан учир Нэгдүгээр орлогч Ж.Батбаясгалан хотыг удирдаж байв. Автобус гуравдугаар баазын даргаар тухайн үеийн НИТХ-ын төлөөлөгч Б.Цолмон гэх залуу байсан.  Байгууллагынх нь газар дуудлага худалдаанд орж орох оронгүй болж байхад Цолмон дарга ус балгасан мэт дуугүй байсан. Тухайн үед үүнийг эсэргүүцсэн ажилчдынхаа хэл амыг ч тэр нам дарсан гэдэг.

Харин одоо тэрбээр НИТХ-ын дарга Ж.Батбаясгалангийн зөвлөхөөр ажиллаж байна. Энэ хардах зүйл биш гэж үү. Дуудлага худалдаатай холбоотой тухайн үед хотыг удирдаж байсан Ж.Батбаясгалан, Автобус гуравдугаар баазын дарга Б.Цолмон нарыг хэн шалгах вэ.

Газар нь зарагдсан байж. Тахилтад баригдаж байгаа шинэ бааз ашиглалтад ортол байгууллагынхаа ажилчдыг автобустай нь гудамжинд гаргахгүй байх гэрээ тохиролцоог Б.Цолмон дарга яагаад хийгээгүй вэ. Мөн тус бааз Б.Цолмон даргын үед хамгийн их өрөнд орсон нь ямар шалтгаантай вэ. Баазын  газрыг 20.2 тэрбумаар зараад Тахилтад 23 тэрбум төгрөгөөр шинэ ажил эхлүүлсэн нь зөв төлөвлөлт, зөв дуудлага худалдаа мөн үү. Ингэх нь хэнд ашигтай байсан бэ. Шинээр барьж буй баазын барилгын ажил 20-30 хувьтай явагдаж байхад газар зарсан 20.2 тэрбум төгрөг нь нийслэлийн данс руу ороод зарцуулагдаад дууссан.

Өнгөрсөн сард тус байгууллагын үйлдвэрчний эвлэл газрынхаа төлөө жагсаал цуглаан хийсэн ч бодит үр дүнд хүрч чадаагүй. Тухайн баазыг газаргүй болгож, олон тэрбум төгрөгийг өрөнд оруулж санхүүгийн чадамжгүй болгох сонирхол хэнд байв.

Өнөөдөр тус байгууллага цалингаа тавьж чадахгүй хэмжээд хүрч ажилчдынхаа цөөнгүй хувийг сул зогсолт хийжээ.Байгууллага нь газаргүй болж байхад чимээгүй суусан, санхүүгийн чадамжгүй байхад өөр дээрээ цалин нэмж авч байсан Б.Цолмон дарга ямар гавьяа байгуулаад НИТХ-ын дарга Ж.Батбаясгалангийн зөвлөхөөр ажиллаж байгааг тайлбарлах хүн хэн бол. Тэрбээр ажлаас нь үндэслэлгүй халсан гэж Хотын дарга Д.Сумьяабазарыг шүүхэд өгчээ. Түүнд автобус гуравдугаар сард баазад дуусгаж амжаагүй ямар ажил байсан юм бол. Б.Цолмон даргатай холбоотой дараагийн мэдээ мэдээллийг холбогдох баримттайгаар бид эргэн мэдээлэх болно.