Сэлэнгэ аймгийн Баянгол сумын Баян багийн Бага мухар гэдэг газраас тус сумын харьяат, 14 настай, эрэгтэй К нь энэ сарын 3-ны өдөр 17:00 цагт гэрээсээ явганаар гараад сураггүй болжээ.  Тус аймгийн Онцгой байдлын газрын Мандал сум дахь Онцгой байдлын хэлтэс, Цагдаагийн хэлтсийн алба хаагчид, тус сумын Засаг даргын Тамгын газрын ажилтнууд, ар гэрийнхэн 14 настай, эрэгтэй, хөгжлийн бэрхшээлтэй хүүг  эрэн хайх ажиллагааг зохион байгуулсан аж. Гэтэл энэ сарын 5-ны 12:30 цагт тус сумын Нарангийн гол хэмээх газраас цогцсыг нь олсон байна. Энэ хэргийн талаар ЗДТГ-ын алба хаагчаас тодруулахад “Сэтгэцийн өөрчлөлттэй учир гэрээсээ гараад явчихдаг хүүхэд юм билээ. Бид Онцгой байдлынхан, цагдаа нартай хамт эрэн хайсан” хэмээлээ.